İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 561 Hüküm no: 660 Orijinal metin no: [80a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülvehhab Efendi b. Şeyh Abdurrahman’ın Keçeci Pîrî Mahallesi Avarızı Vakfı’ndan aldığı 300 guruş borç karşılığında menzilini rehin verdiği İstiğlâl. Mahmiye-i İstanbul’da Sultan Bâyezid mahallesi ahâlîsinden Abdülvehhab Efendi b. eş-Şeyh Abdurrahman meclis-i şer‘de mahmiye-i merkūmede Keçeci Pîrî mahallesi avârızına vakf olan nükūda hâlâ mütevellî olan hâfızü’l-vesîka Mehmed Çelebi b. Mustafa mahzarında ikrâr ve takrîr-i kelâm edip mahalle-i merkūme Sultan Bâyezid mahallesinde vâki‘ bir tarafı Yusuf Ağa mülküne ve bir tarafı Sultan Bâyezid Vakfı[‘na âid] olan dekâkîne ve iki tarafı tarîk-i hâssa müntehî büyût-ı adîdeyi müştemil mülk menzilimi vakf-ı mezbûrdan mütevellî-i mezbûr yedinden iktirâz ve kabz eylediğim üç yüz esedî guruşa bi-tarîkı’l-istiğlâl bey‘ ve teslîm ol dahi ber-minvâl-i muharrer iştirâ ve tesellüm eyledikden sonra ba‘de’t-tahliyeti’ş-şer‘iye şehr-i âtî gurresinden bir sene tamamına dek kırk beş esedî guruşa istîcâr ve tesellüm ve mütevellî-i mezbûr dahi îcâr ve teslîm eyledi dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Mehmed Efendi b. Hüseyin el-imâm, Ömer Efendi b. Ali el-imâm, Halil Çelebi b. İbrahim, Hüseyin Efendi b. Ali, Hüseyin Efendi el-Burûsî, Mustafa Çelebi b. İsa, Ahmed Çelebi b. Mahmud, Kasab Mustafa b. Mehmed, Abdi b. Hüseyin, Resûl b. Rıdvan, Şükrullah b. Mustafa.