İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 562 Hüküm no: 661 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alime bt. Osman’ın Mehmed Efendi b. Mehmed Efendi’den aldığı borç karşılığında mülk menzilini rehin verdikten sonra altı aylığına kiraladığı İstiğlâl. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi mahmiye-i İstanbul’da el-Hâc Ferhad mahallesinde Âlime bt. Osman nâm hatunun zikri âtî sâkine olduğu menzile varıp zeyl-i rakīmde isimleri mastûr olan Müslimîn huzûrunda akd-i meclis-i şer‘ eyledikde mezbûre Âlime zâtı Mehmed Efendi b. Hüseyin ve Mehmed b. Hasan ta‘rîfleri ile mu‘arrefe oldukdan sonra meclis-i ma‘kūd-ı mezbûrda işbu kitâbın sahibi efdalü’l-müderrisîn ekmelü’l-muhakkıkīn Seyyid Mehmed Efendi b. Seyyid Mehmed Efendi tarafından ikrâr-ı âti’z-zikri tasdîka vekîl olup Abdülkadir b. Hüseyin ve Ali Bey b. Mehmed şehâdetleri ile vekâleti sâbite olan Mustafa Efendi b. Hamza mahzarında bi-tav‘ihâ ikrâr ve i‘tirâf edip mahalle-i mezbûrede vâki‘ bir tarafı el-Hâc Abdullah mülküne ve iki tarafı Üstâd el-Hâc Hamza menziline ve bir tarafı tarîk-i âmma müntehî işbu sâkine olduğum mülk menzilimi müvekkil-i mûmâ-ileyh Seyyid Mehmed Efendi’ye bi-tarîkı’l-istiğlâl iki yüz doksan kıt‘a riyâlî kebîr guruşa bey‘ ve teslîm ol dahi ber-vech-i muharrer iştirâ ve kabûl ve kabz ve tesellüm eyledikden sonra semeni olan meblağ-ı mezbûr iki yüz doksan kıt‘a riyâlî kebîr guruş ki her biri yedişer dirhem olmak üzere yedinden ahz u kabz edip menzil-i mezbûr ba‘de’t-tahliyeti’ş-şer‘iye ve’t-takābuz imdi târih-i kitâbdan altı ay tamamına değin mûmâ-ileyh Seyyid Mehmed Efendi’den on kıt‘a kebîr guruşa istîcâr ve kabûl ve kabz edip ol dahi ber-vech-i muharrer îcâr ve teslîm eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an ba‘s olunan Hasan b. Bayram ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa b. Ömer Çelebi el-imâm, Salih Efendi b. Salih, Şaban b. Mehmed, Mustafa b. ( ), Abdülkadir b. Hüseyin, Ali Ağa b. Mehmed.