İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 563 Hüküm no: 662 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Hüseyin’in menzil satışı hususunda İsmail Efendi b. Mehmed ile 15.000 akçe üzerine sulh olduğu Sulh, ibrâ. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi mahmiye-i İstanbul’da Yenibağçe kurbünde Karabaş mahallesinde sâkin umdetü erbâbü’t-tahrîr ve’l-kalem zübdetü ashâbi’t-tastîr ve’r-rakām İsmail Efendi b. Mehmed’in sâkin olduğu menziline varıp akd-i meclis-i şer‘ eyledikde mahrûse-i Üsküdar’da Kıyam Çeşmesi kurbünde sâkin Mehmed Çelebi b. Hüseyin meclis-i ma‘kūd-ı mezbûrda işbu kitâbın sahibi mûmâ-ileyh İsmail Efendi mahzarında tav‘an ikrâr ve i‘tirâf edip mahalle-i mezbûrede vâki‘ bir tarafı Mehmed Çelebi b. Memi mülkü ve bir tarafdan İnekci İbrahim b. Abdullah mülküne ve bir tarafı Kerîme Hatun bt. Abdullah mülküne ve bir tarafı tarîk-i âmma müntehî üç bâb fevkānî oda ve bir nîm sofa ve üç bâb tahtânî oda ve kenîf ve bir ahırı ve meyline tâbi‘ mâ-i cârîde olan hakk-ı şurbu ve zât-ı eşcâr-ı müsmire ve gayr-ı müsmire hadîkayı müştemil mülk menzilimi bin altmış bir Cemâziyelâhire’sinin on üçüncü gününde umûr-ı şer‘iye-i askeriyye istimâ‘ına memûr olan Ahmed Efendi b. Mustafa huzûrunda ben bâliğ ve reşîd iken mezbûr İsmail Efendi’ye bin yedi yüz riyâlî guruşa bey‘ ve teslîm ol dahi iştirâ ve tesellüm ve kabûl ve kabz ve semen-i mezbûru bana teslîm ben dahi ahz u kabz etmişdim lâkin menzil-i mezbûr ol târihde iki bin beş yüz guruş değer iken mezbûr İsmail Efendi menzil-i mezbûru ancak bin yedi yüz guruş değer deyü beni tağrîr etmekle ben dahi mezbûrun tağrîrine binâen bey‘ etmişdim deyü semen-i mislini da‘vâ ve taleb etmişdim. El-hâletü-hâzihî da‘vâ-i mezbûreden merkūm İsmail Efendi on beş bin akçe üzerine benimle inşâ-i akd-i sulh ettikde ben dahi sulh-ı mezbûru kabûl ve bedel-i sulh olan meblağ-ı mezbûru merkūm İsmail Efendi yedinden meclis-i mezbûrda ahz u kabz edip husûs-ı mezbûra müte‘allika âmme-i de‘âvî ve eymân [ve] muhâsamâtdan mezbûr İsmail Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm mezbûr İsmail Efendi ile vechen mine’l-vücûh ve sebeben mine’l-esbâb da‘vâ ve nizâ‘ım ve alâka ve medhalim kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa Çelebi b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’t-tâsi‘ ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Mehmed Ağa b. Yusuf, Mehmed Efendi, Mehmed Ağa b. Receb, el-Hâc Mehmed Beşe b. Mustafa, Mehmed Çelebi b. Hüseyin, Ali Çavuş b. Hasan, el-Hâc Mustafa b. Ebûbekir, el-Hâc Receb Ağa b. Mustafa, İbrahim b. Dilaver.