İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 564 Hüküm no: 664 Orijinal metin no: [80b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şarapçı Yorgi v. Mihal’in aldığı borç ve faizi hususunda çıkan anlaşmazlıkta Ahsaksados v. Anastaş ile sulh olduğu Sulh, ibrâ. Mahmiye-i İstanbul’da Balat Kapısı hâricinde Karabaş mahallesinde mütemekkin Yorgi v. Mihal nâm hammâr zimmî meclis-i şer‘de hâmil-i hâze’s-sifr Ahsaksados v. Anastaş mahzarında ikrâr ve takrîr-i kelâm edip târih-i kitâbdan sekiz sene mukaddem mezbûr Ahsaksados’dan iki yüz elli riyâlî guruş istikrâz ve kabz eylediğimden sonra mahalle-i mezbûrede vâki‘ silk-i mülkümde münselik lede’l-ahâlî ma‘lûmü’l-hudûd menzilimi ve yine mahalle-i mezbûrede vâki‘ meyhânede olan rub‘ hissemi mezbûr Ahsaksados’a iki yüz elli riyâlî guruşa bâtten bey‘ ve teslîm ol dahi iştirâ ve kabûl eyledikden sonra semen-i mezbûru zimmetimde müşteri-i mezbûra deyni olan meblağ-ı mezbûra takās ol dahi mukāssa ve kabûl eyledikden sonra menzil-i mezbûr kıymetde iki yüz elli guruş mukābelesinde rehindir deyü zikrolunan iki yüz elli guruşun fâidesi nâmıyla sekiz senede otuz yedi bin akçem aldın deyü bundan esbak mezbûr Ahsaksados’dan meblağ-ı mezbûr otuz yedi bin akçemi mezbûrdan da‘vâ ve taleb eylediğimde ol dahi inkâr ve ben dahi müdde‘âmı isbât sadedinde olmağla beynimizde münâza‘ât-ı kesîre câriye olmuşdu. El-hâletü-hâzihî beynimize muslihûn ve Müslimîn tavassut edip mezbûr Ahsaksados on bir bin akçe üzerine benimle meblağ-ı mezbûr da‘vâsından inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûru tamamen mezbûr Ahsaksados yedinden alıp kabz eyledim ba‘de’l-yevm husûs-ı mezbûra müte‘allika da‘vâdan nizâ‘ım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Ahmed Çavuş b. Mehmed, Ali Çavuş b. Yahya el-mübâşir, Hüseyin b. Osman, Muslı Çavuş b. ( ), Abdi b. Hüseyin, Mehmed Çelebi b. Abdullah, Dimitri v. Dilyar, Plaş v. Dimitri, Kiryako v. Poliharon.