İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 566 Hüküm no: 666 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir Beşe b. Mustafa’nın mudarabe yoluyla Mustafa b. Mehmed’e verdiği paradan dokuz bin akçe alacağı kaldığı İsbât-ı meblağ: 9.000 aded. Mahmiye-i İstanbul’da Bali Paşa mahallesinde sâkin el-Hâc Abdülkadir Beşe b. Mustafa mahfil-i kazâda Mustafa b. Mehmed nâm kimesne mahzarında üzerine da‘vâ ve takrîr-i kelâm edip târih-i kitâbdan bir sene mukaddem mezbûr Mustafa’ya bi-tarîkı’l-mudârabe altmış bin akçe def‘ ü teslîm ol dahi yedimden ahz u kabz edip hatta meblağ-ı mezbûru yedimden ahz u kabzını alâ-re’si’l-işhâd ikrâr ve işhâd etmişdi. Meblağ-ı mezbûr altmış bin akçenin elli bir bin akçesini yedinden kabz edip meblağ-ı mezbûrdan merkūm Mustafa yedinden bâkī kalan dokuz bin akçei hâlâ taleb eyledimde vermede ta‘allül eder suâl olundukda udûl-i Müslimînden el-Hâc Abdülcelil b. Ali ve Mustafa Beşe b. Mehmed nâm kimesne li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûr Mustafa târih-i mezbûrda merkūm el-Hâc Abdülkadir Beşe yedinden bi-tarîkı’l-mudârabe altmış bin akçe alıp kabz eyledim deyü ikrâr ve bizi işhâd eyledi biz bu husûsa şâhidleriz ve şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle olmağın mûcebince meblağ dokuz bin akçe[y]i müdde‘î-i mezbûr el-Hâc Abdülkadir Beşe’ye edâ ve teslîme merkūm Mustafa’ya tenbîh birle mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Ali Beşe b. Mehmed el-mübâşir, Şaban Beşe b. Ahmed, Abdi Çelebi b. Hüseyin, Mehmed b. Ramazan ve gayruhum.