İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 566 Hüküm no: 667 Orijinal metin no: [81a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslime bt. İnebey’den haksız yere para almadığına dair Mehmed Ağa b. Kasım’ın yemin ettiği Yemîn. Vilâyet-i Anadolu’da medîne-i Kastamonu’da İnebey mahallesinde sâkine Müslime bt. İnebey nâm hatun mahfil-i kazâda işbu bâ‘isü’l-kitâb kıdvetü’l-emâsil ve’l-a‘yân Mehmed Ağa b. Kasım mahzarında üzerine da‘vâ ve takrîr-i kelâm edip mezbûr Mehmed Ağa târih-i kitâbdan iki sene mukaddem medîne-i mezbûrede voyvoda olup oğlum gāib ani’l-meclis Mustafa Beşe ile kendi hâlimizde giderken mezbûr Mustafa Beşe’yi benim için yanında nâ-mahrem avrat vardır deyü habs edip bi-gayr-ı vech-i şer‘î benden yirmi sekiz altın ile iki bin sekiz yüz akçemi ahz u kabz etmişdir hâlâ mezbûrdan suâl olunup hakkım alıverilmek matlûbumdur dedikde gıbbe’s-suâl ve akībe’l-inkâr müdde‘iye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘iye-i mezbûre Müslime Hatun’dan bi-gayr-ı vech-i şer‘î yirmi sekiz altın ile iki bin sekiz yüz akçesini ahz u kabz etmediğine mezbûr Mehmed Ağa’ya yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mezbûre Müslime Hatun bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mefharu’l-müderrisîn Mehmed Efendi, Fahrü’l-kuzât Ramazan Efendi, Ali Efendi b. el-Hâc Muhyiddin, el-Hâc Ahmed b. ( ), Yusuf Çavuş el-mübâşir.