İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 594 Hüküm no: 685 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Göllükesri kazasından bazı zimmîlerin kendilerinden haksız yere para aldığını iddia etdikleri Voyvoda Derviş Ağa b. Derviş ile 12.000 akçe üzerine sulh oldukları Husûs-ı âti’l-beyânın mahâllinde tahrîri için gıbbe’l-iltimâs kıbel-i şer‘-i mutahhardan Mevlânâ Ahmed Efendi b. el-Hâc İbrahim irsâl olunup ol dahi mahmiye-i İstanbul’da Hoca Teberrük mahallesinde Koğacızâde fahrü’l-a‘yân İsmail Ağa’nın sâkin olduğu menziline varıp zeyl-i rakīmde isimleri muharrer olan Müslimîn huzûrlarında akd-i meclis-i şer‘-i şerîf eyledikde Vilâyet-i Rumeli’nde Göllükesri kazâsına tâbi‘ Mavrak nâm karyeden Kosta v. Medko ve Saro v. Sinadin ve Kiryazi v. Yorgi ve Apostol v. Veled ve Yani v. Rayi ve Yani v. Hıristo ve sâir ahâlî-i karye taraflarından husûs-ı âti’l-beyâna vekîl olup vekâleti zikri mürûr eden Göllükesri kasabası sâkinlerinden Receb Beşe b. Ali ve Mustafa b. Hamza şehâdetleri ile sâbite olan Velerso v. Agop nâm zimmî meclis-i ma‘kūd-ı mezbûrda mahmiye-i merkūmede Ali Paşa-yı Atîk mahallesinde sâkin Derviş Ağa b. Derviş tarafından husûs-ı câ’i’z-zikri tasdîka vekîl olup vekâleti İbrahim Hakkı b. Süleyman ve Derviş b. Mustafa şehâdetleriyle sâbite olan mefharu’s-sâdât es-Seyyid Mustafa Efendi b. Ali mahzarında bi’l-vekâle ikrâr ve takrîr-i kelâm edip târih-i kitâbdan üç sene mukaddem merkūm Derviş Ağa cânib-i mîrîden zikrolunan Göllükesri mukāta‘asına voyvoda olup sâir senelerde ahâlî-i mezbûrdan cânib-i mîrî için sâbıkā voyvodaların aldıkları ispençe ve rüsûm-ı bağātdan ziyâde fuzûlî beş yüz kıt‘a riyâlî guruş ahz u kabz eylemişdi deyü mezbûr Derviş Ağa’dan bundan akdem bi’l-vekâle da‘vâ ve taleb eylediğimde beynimizde münâza‘ât-ı kesîre vâkı‘a olmuşdu el-hâletü hâzihî beynimize muslihûn tavassut etmekle müvekkil-i mezbûr Derviş Ağa benimle on iki bin nakd-i râyic fi’l-vakt akçe üzerine inşa-i akd-i sulh eylediklerinde ben dahi bi’l-vekâle sulh-ı mezbûru kabûl ve bedel-i sulh olan meblağ-ı mezbûr on iki bin akçeyi vekîl-i mezbûr es-Seyyid Mustafa Efendi yedinden tamamen ahz u kabz eyledim ba‘de’l-yevm husûs-ı merkūma müte‘allika da‘vâdan müvekkil-i mezbûr Derviş Ağa’nın zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli [87b] mevlânâ-yı mezbûr mahâllinde tahrîr ba‘dehû ma‘an irsâl olunan Eyüb b. Ahmed ile gelip meclis-i şer‘de alâ-vukū‘ihî inhâ ve takrîr etmeğin mâ-vaka‘a bi’t-taleb kayd-ı sicil olundu. Fi’l-yevmi’l-hâdî aşere min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: İsmail Ağa b. el-Hâc Mehmed, el-Hâc Ramazan b. el-Hâc Mehmed, el-Hâc Musa b. Mehmed, İbrahim Çelebi b. Şaban, Mehmed Beşe b. Ferhad.