İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 595 Hüküm no: 686 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. İbrahim Ağa’nın Rus asıllı cariyesi Bağcinan’ı azat ettiği Mahrûse-i Galata’ya tâbi‘ cezîre-i Marmara’da sâkin Hadîce Hatun bt. el-merhûm İbrahim Ağa tarafından ikrâr-ı âti’z-zikre vekîl olup mezbûrenin zâtını ma‘rifet-i şer‘iye ile ârifân birâderleri Ahmed Ağa ve Mehmed Ağa b. el-merhûm İbrahim Ağa şehâdetleri ile şer‘an vekâleti sâbite olan zevci fahrü’l-kuzât Mehmed Efendi b. el-merhûm Mehmed Efendi meclis-i şer‘-i kavîm-i enver ve mahfil-i dîn-i münîf-i ezherde bi’l-vekâle ikrâr ve takrîr-i kelâm edip müvekkilem mezbûre kendüye rıkkını mu‘terife olan orta boylu gök gözlü Rusiyyetü’l-asl bâ‘isetü’l-kitâb Bağcinan bt. Abdullah nâm câriye-i memlûkesini hasbeten lillâhi te‘âlâ el-meliki’l-mennân ve amelen bi-mâ kāle’n-nebiyyü’l-muhtâr “Men a‘taka rakabeten mü’mineten a‘takallahu bi-küllî uzvin minhû uzven minhû mine’n-nâr” tahrîr ve i‘tâk ve silk-i harâ’ir-i asliyâta idrâc ve ilhâk eyledi ba‘de’l-yevm merkūme Bağcinan sâir harâ’ir-i asliyât gibi hürre olup üzerinde velâ-i şer‘îden gayrı hakkı kalmadı dedikde vâki‘u’l-hâl ketb ve sebt olundu. Fi’l-yevmi’r-râbi‘ ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Fahrü’l-müderrisîn el-Hâc Mustafa, Fahrü’l-müderrisîn Kadri Çelebi, Mefharu’l-kuzât Mahmud Efendi b. İbrahim Çelebi el-Borî min-kurb-i Konya, Kâtibü’l-hurûf İslam Efendi, Fahrü’l-a‘yân Züfikar Ağa b. ( ), Süleyman Çelebi b. ( ), Fahrü’l-a‘yân Dilaver Ağa, Musa Çelebi b. ( ) el-mütevellî ve gayruhum mine’l-hâzırîn.