İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 595 Hüküm no: 687 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Osman’ın Aleksi v. Bedros’da otuz riyali guruş alacağı olduğunu ispat edemediği Vilâyet-i Anadolu’da Eğin kazâsına tâbi‘ Mizri [Mezri] nâm karye sâkinlerinden Mustafa Beşe b. Osman meclis-i şer‘-i hatîrde işbu bâ‘isü’l-kitâb Aleksi v. Bedros nâm zimmî muvâcehesinde da‘vâ ve takrîr-i kelâm edip mezbûr Aleksi’nin emri ile karye-i mezkûrede mezkûrun zevcesi Nazlı yedine alâ-tarîkı’l-karz sekiz ay mukaddem otuz riyâlî guruş def‘ ü teslîm eylemişdim ol dahi yedimden ahz u kabz eylemişdir. Hâlâ emri üzere mezbûr Aleksi’den suâl olunup alıverilmek taleb ederim dedikde gıbbe’s-suâl ve’l-inkâr müdde‘î-i merkūmdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin sekiz ay mukaddem zevcesi mezbûre Nazlı’ya otuz riyâlî guruş def‘ eyle deyü mezbûr Mustafa Beşe’ye merkūm Aleksi’ye yemîn teklîf olundukda ol dahi alâ-vefki’l-mesûl halfü billâhillezî enzele’l-İncîle alâ-İsa etmeğin mûcebince müdde‘î-i merkūm bilâ-beyyine mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-işrîn [min-Şevvali’l-mükerrem] li-sene isneteyn ve seb‘în ve elf. Şuhûdü’l-hâl: Mehmed Efendi b. Abdülkadir, Halebîzâde Mehmed Çelebi, Mehmed b. Mustafa, Mustafa [b.] Mehmed, Şükrullah [b.] Mustafa.