İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 609 Hüküm no: 700 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Muslı’nın Üsküdar’daki mülk bağını Mustafa b. İsa’ya satıp Küre kazasındaki tarlasının da kullanım hakkını devrettiği Mübâya‘a ma‘a ferâğ. Vilâyet-i Anadolu’da Küre kazâsına tâbi‘ Üyücek nâm karyede sâkin Hüseyin b. Muslı nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mustafa b. İsa nâm kimesne mahzarında ikrâr ve takrîr-i kelâm edip silk-i mülkümde münselik mahrûse-i Üsküdar kazâsına tâbi‘ Büyük Maldepe nâm mevzi‘de vâki‘ bir tarafı Çobanî bağına ve bir tarafı Çividoğlu bağına ve bir tarafı harâba müşrif bağ yerine ve bir tarafı kayaya müntehî Uzunpare demekle şehir dört dönüm mülk bağımı kâffe-i hukūk ve merâfıkı ile târih-i kitâbdan bir sene mukaddem tarafeynden îcâb ve kabûlü hâvî bey‘-ı bâtt-ı sahîh-i şer‘î ile yedi bin fıddî râyic fi’l-vakt akçeye mezbûr Mustafa’ya bey‘ ve teslîm edip ol dahi vech-i muharrer üzere iştirâ ve tesellüm eyledikden sonra zikrolunan Üyücek nâm karye sınırında vâki‘ bir tarafı Mehmed Çelebi tarlasına ve bir tarafı Maranda tarlasına ve bir tarafı Köseoğlu tarlasına ve bir tarafı kayaya müntehî tarlamın dahi hakk-ı tasarrufunu târih-i mezbûrda sahib-i arz ma‘rifetiyle yedi bin fıddî akçeye yine mezbûr Mustafa’ya ferâğ ve tefvîz ol dahi tefevvüz ve tesellüm eyledikden sonra semen-i mezkûr ile bedel-i merkūm zimmetinde kalmışdı hâlâ semen-i mezbûr ile bedel-i merkūm cem‘an on dört bin akçeyi merkūm yedinden ahz u kabz eyledim zikrolunan bağ mülk-i müşterâsı ve tarla hakk-ı müfevvazıdır dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min-Şa‘bân li-sene isneteyn ve seb‘în ve elf. Şuhûdü’l-hâl: Mustafa Çelebi b. Habib, Mustafa Çelebi b. Şemseddin, Halil Halîfe b. Musa, Muharrem Çelebi b. Ömer, Ahmed b. Musa, Halil Çelebi b. Ömer, İbrahim Çavuş b. Yusuf Efendi, Mahmud Çelebi b. ( ), Mehmed Çelebi b. Mahmud, Sarıoğlu Mehmed Çelebi b. ( ), Oruc Beşe b. İbrahim ve gayruhum mine’l-hâzırîn.