İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 610 Hüküm no: 701 Orijinal metin no: [89M/b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın Çerkes asıllı cariyesi Zamane’yi azat ettiği Itknâme. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlâ Keşfî Mustafa Efendi irsâl olunup ol dahi mahmiye-i İstanbul’da Mismârî Şucâ‘ mahallesinde Emine bt. Abdullah nâm hatunun sâkine olduğu menziline varıp zeyl-i rakīmde isimleri mastûr olan Müslimîn akd-i meclis-i şer‘ eyledikde mezbûre Emine zâtı ma‘rifet-i şer‘iye ile ârifân mahalle-i mezbûre sükkânından Mustafa Çelebi b. el-Hâc Mehmed ve Ramazan Beşe b. Hasan ta‘rîfleri ile mu‘arrefe oldukdan sonra meclis-i mezbûrda bi-tav‘ihâ ikrâr ve i‘tirâf edip işbu orta boylu gök elâ gözlü açık kaşlı Çerkesiyyetü’l-asl Zamâne bt. Abdullah nâm câriye-i memlûkesi hasbeten lillâhi te‘âlâ ve taleben li-merzâti Rabbihî’l-a‘lâ tahrîr ve i‘tâk ve silk-i harâ’ir-i asliyâta idrâc ve ilhâk eyledim ba‘de’l-yevm mezbûre Zamâne sâir harâ’ir-i asliyât gibi hürre olup üzerinde velâdan gayrı hakkım bâkī kalmadı dedikde vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hasan b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Hasan Ağa b. Hızır, Abdullah Çelebi b. Hüseyin, Ramazan b. Hasan, Mustafa b. Mehmed, Mehmed Çelebi b. Ali, Mustafa Çelebi b. Mehmed, Abdi Çelebi b. Mehmed, Abdullah Çelebi b. İbrahim, Mehmed b. Ali el-müezzin, Ahmed b. Mehmed.