İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 610 Hüküm no: 702 Orijinal metin no: [89M/b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdullah’ın öldükten sonra malının üçte birine Mehmed Beşe b. Ali’yi vasî tayin ettiği Hüccet-i vasiyyet Husûs-ı âti’l-beyânın mahâllinde tahrîri iltimâs olunmağın kıbel-i şer‘den Mevlânâ Keşfî Mustafa Efendi irsâl olunup ol dahi mahmiye-i İstanbul’da Mismârî Şucâ‘ mahallesinde Emine bt. Abdullah nâm hatunun sâkine olduğu menziline varıp zeyl-i rakīmde muharrerü’l-esâmî olan Müslimîn huzûrunda akd-i meclis-i şer‘ eyledikde mezbûre Emine’nin zâtı mahalle-i mezbûre sükkânından Mustafa Çelebi b. el-Hâc Mehmed ve Ramazan Beşe b. Hasan ta‘rîfleriyle mu‘arrefe oldukdan sonra meclis-i ma‘kūd-ı mezbûrda zevci işbu bâ‘isü’l-kitâb Mehmed Beşe b. Ali mahzarında bi-tav‘ihâ ikrâr ve takrîr-i kelâm edip ben bi-emrillâhi te‘âlâ vefât eylediğimde zevcim mezbûr Mehmed Beşe vasî-i muhtârım olup silk-i mülk-i sahîhimde münselik mahalle-i mezbûrede vâki‘ bir tarafı mezbûr Ramazan Beşe mülküne ve bir tarafı Mehmed Çelebi mülküne ve bir tarafı mahalle-i mezbûre avârızına mevkūfe menzile ve bir tarafı tarîk-i âmma müntehî fevkānî ve tahtânî büyût-ı müte‘addideyi müştemil menzilim ile işbu on miskāl altından masnû‘ bir tek endîşe? bilezik ve bir sîm ön kuşak ve iki beledî döşek ve iki beledî minder ve dört beledî yasdık ve iki köhne velense ve iki köhne keçe ve iki beledî yorgan ve bir köhne alaca kilim ve bir köhne kaliçe ve iki tencere ve üç sahan ve bir tepsi ve iki güğümü semen-i misilleri ile âhara bey‘ eyledikden sonra cemî‘ mâlımın sülüsünü ifrâz edip beş yüz akçesini ıskāt-ı salâtıma ve yüz akçesini telkīnime ve yüz akçesini gassâlime ve elli akçesini su koyana ve bin akçesini yevm-i defnimde fukarâya tesâdduk ve iki bin akçesini eyyâm-ı mu‘tâdede ta‘âm tabh olunup fukarâya tevzî‘ oluna ve bâkī kalan meblağı ahâlî-i mahallenin ma‘rifetleri ve mezbûr Mehmed Beşe yediyle alâ-vechi’l-helâl istirbâh olunup hâsıl olan gallesini [mahalle-i] mezbûre imâmına verilip ol dahi evkāt-ı selâsede üçer İhlâs-ı şerîf tilâvet edip sevâbını rûhuma ihdâ eyleye deyü vasiyyet ve bu vesâyâyı tenfîze mezbûr Mehmed Beşe’yi vasî nasb ve ihtiyâr eyledim dedikde ol dahi vesâyet-i mezbûreyi kabûl ve hizmet-i lâzımesini edâya ta‘ahhüd etmeğin vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hasan b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Sâbıkūn.