İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 611 Hüküm no: 703 Orijinal metin no: [89M/b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’e ait mülk arsa ile Valide Sultan’a ait mülk arsanın değiştirilmesi Mahmiye-i İstanbul’da hâlâ Adliye ta‘bîr olunup müceddeden binâ olunan câmi‘-i şerîf kurbünde lede’l-ahâlî ma‘lûmü’l-hudûd tûlen ve arzan be-hesâb-ı şatrancî altmış üç zirâ‘ arsa-i memlûke üzerine mebnî olup binâsı bin yetmiş Zilka‘desi’nin on altıncı gününde vâki‘ olan harîk-i gālibde muhterik oldukda bâkī olan arsa-i sırfanın mutasarrıfe ve mâlikesi hâfızetü’l-kitâb Âişe Hatun bt. Mehmed tarafından husûs-ı âti’l-beyânı ikrâra vekîl-i sâbitü’l-vekâlesi sadrî kebîr oğlu İbrahim Çelebi b. Şükrullah meclis-i şer‘de Sultanü’l-muhadderât bürhânü’l-mutahharât Hazret-i Vâlide Sultan -dâmet ismetuhâ- taraf-ı bâhirü’ş-şereflerinden kethudâlıkları hizmeti ile şeref-yâb olan umdetü’l-emâcid ve’l-e‘âlî câmi‘ü’l-mehâmid ve’l-meâli ‘izzetlü Hasan Ağa b. Mehmed Ağa hazretleri muvâcehesinde bi’l-vekâle ikrâr ve i‘tirâf edip akd-i âtî sudûruna değin silk-i mülkümde münselik olan arsa-i mezkûresini mûmâ-ileyh Hasan Ağa hazretlerine râyic fi’l-vakt yirmi beş bin akçeye bey‘ ve teslîm ol dahi Sultan -ı müşârün-ileyhâ hazretleri için iştirâ ve tesellüm etdikden sonra semeni olan meblağ-ı mezbûr yirmi beş bin akçe mukābelesinde mûmâ-ileyh Hasan Ağa hazretleri müşârün-ileyh Vâlide Sultan hazretlerine mahrûse-i Galata’da vâki‘ ma‘lûmü’l-hudûd olup mülkiyetine hükm-i şer‘î lâhık ve hatt-ı hümâyûn-ı sa‘âdet-makrûnla temlîk olunan Yani Kenîsesi demekle ma‘rûf olan kenîsenin kıble tarafında vâki‘ iki yüz dört zirâ‘ arsa-i mebniye bana def‘ ü teslîm ve mahâllinde kabzına taslît etdikde ben dahi müvekkilem için tesellüm ve kabz eyledim min-ba‘d arsa-i muhterika-i memlûke Sultan -ı müşârün-ileyh hazretlerinin mülk-i müşterâları olup keyfe mâ teşâ’ mutasarrıfe olsunlar dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Umdetü’l-a‘yân İbrahim Ağa el-emîn, Mustafa Ağa ser-mi‘mârân, Umdetü erbâbü’t-tahrîr ve’l-kalem Murtazallah?, Ali Efendi b. ( ), Ahmed Çelebi b. ( ), Mehmed Ağa el-mütevellî.