İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 612 Hüküm no: 705 Orijinal metin no: [90M/a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mankik v. Marat’ın habbâz dükkânı içindeki bargir ve aletlerde olan hissesini Aleksan v. Ohan’a sattığı Mübâya‘a. Vilâyet-i Anadolu’da Eğin kazâsına tâbi‘ Hozkerek nâm karyede sâkin Mankik v. Marat tarafından husûs-ı âti’-zikre vekîlleri olup vekâletleri Hokaz v. Sahmer ve Arakil v. Mezaver nâm zimmîler şehâdetleri ile şer‘an vekâletleri sâbite olan oğulları Bogos ve Bedros nâm zimmîler meclis-i şer‘de işbu hâmilü’s-sifr Aleksan v. Ohan nâm Ermeni zimmî muvâcehesinde her biri bi’l-vekâle ikrâr ve takrîr-i kelâm edip mahmiye-i İstanbul’da Balıkpazarı kurbünde gümrük ardında vâki‘ İbrahim Ağa nâm kimesnenin habbâz dükkânı içinde mevcûd olan yirmi re’s değirmen bargiri ve bir kazgan ve sâir âlât-ı habbâziyenin rub‘-ı şâyi‘i babamız mezbûr Mankik’in mülkü ve nısf-ı şâyi‘i müşteri-i mezbûr Aleksan’ın ve rub‘-ı şâyi‘-i âharı dahi gāib ani’l-meclis Nehabet nâm Ermeni’nin mülkü olup ilâ-hîni sudûr-ı hâze’l-akd şâyi‘an mutasarrıflar idi el-hâletü hâzihî zikirleri sebk eden bargir ve kazgan ve sâir âlâtda babamın mülkü olan rub‘ hisse-i şâyi‘asını vekâlet-i mahkiyemiz hasebiyle mezbûr Aleksan’a on yedi bin beş yüz akçeye bâtten bey‘ ve teslîm ol dahi ber-minvâl-i muharrer iştirâ ve kabûl ve tesellüm eyledikden sonra semeni olan meblağ-ı mezbûru bi’t-tamam ve’l-kemâl yedinden alıp kabz eyledik min-ba‘d zikrolunan mebî‘-i mezbûrda mezbûr Mankik’in alâkası kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed Efendi b. ( ), Ahmed Beşe er-râcil, Mustafa Beşe b. ( ) er-râcil, Abdi b. Hüseyin, Veli b. Mahmud. Hokaz v. Zirak, Arakil v. Marat, Honbalı v. Delek, Haçok v. Marat.