İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 613 Hüküm no: 706 Orijinal metin no: [90M/a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Alaşehirli Mataracı Ahmed Ağa’nın miras hususunda kız kardeşi Saime ile sulh olduğu Alaşehirli Ser-oda Mehmed Ağa’nın sulh hüccetidir. Vilâyet-i Anadolu’da Aydın Sancağı’nda Alaşehir sâkinlerinden olup bundan akdem vefât eden Mataracı Ahmed Ağa’nın verâseti zevce-i metrûkesi Cemile Hatun bt. Ahmed’e ve sulbiye kebîre kızları Fâtıma ve Saime’ye münhasıra olduğu şer‘an mütehakkık oldukdan sonra mezbûre Fâtıma Hatun tarafından sulh-ı câ’i’z-zikre vekîl olup mezbûrenin zâtını ma‘rifet-i şer‘iye ile ârifân olan el-Hâc Mehmed b. Hasan ve Mehmed b. ( ) şehâdetleri ile şer‘an vekâleti sâbite olan fahrü’l-kuzât zevci Sinan Efendi meclis-i şer‘de işbu bâ‘isü’l-kitâb mezbûre Saime Hatun tarafından kezâlik sulha vekîl olup onun dahi vekâleti mezbûreyi ma‘rifet-i şer‘iye ile ârifân olan Himmet Beşe ve Ebûbekir Beşe nâm râciller şehâdetleri ile şer‘an sâbite olan zevci Mehmed Odabaşı b. Ebûbekir mahzarında ikrâr ve takrîr-i kelâm edip müvekkile-i mezbûre Fâtıma Hatun’un babası müteveffâ-yı mezbûrun terekesinden olup yedlerinde olan defter-i taksîmden hâric altı yüz keyl arpa ve yetmiş re’s camus ve karasığırı ve yüz elli re’s koyun ve on altı re’s kısrak ve üç bin çeki penbe ve sâir beynimizde ma‘lûm terekeye müvekkile-i mezbûre Saime Hatun vâzı‘atü’l-yed olmağın bundan akdem müvekkilemin yedi sehm hisse-i şâyi‘asını vekîl-i mezbûr Mehmed Odabaşı’dan da‘vâ ve taleb eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî beynimize vesâtet-i muslihîn ve Müslimîn ile da‘vâ-yı meşrûhamdan mezbûr Mehmed Odabaşı benimle bi’l-vekâle on beş bin akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr on beş bin akçeyi vekîl-i mezbûr [Mehmed] Odabaşı yedinden tamamen ahz u abz eyledim dedikde gıbbe’t-tasdîkı’l-mu‘teber vekîl-i mezbûr Mehmed Odabaşı meclis-i mezbûrda vekîl-i mezbûr Sinan Efendi mahzarında takrîr-i kelâm edip müteveffâ-yı mezbûrun techîz ve tekfînine ve resm-i kısmetine otuz bin akçe ve düyûn-ı müsbetesine kırk sekiz bin akçe ve dahi müvekkile-i mezbûre Fâtıma Hatun’un emri ile me’ûnetine harc u sarf eylediğim altmış dört bin akçe ki cem‘an yüz kırk iki bin akçeden mukaddemâ muhallefâtdan ben bey‘ ve kabz-ı semen eylediğim kırk sekiz bin akçeden bâkī doksan dört bin akçe da‘vâsından müvekkile-i mezbûre Fâtıma Hatun’u ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm meblağ-ı mezbûra müte‘allika benden asâleten ve vekâleten da‘vâ dahi sudûr ederse lede’l-hükkâm mesmû‘a olmasın dedikde gıbbe’t-tasdîkı’ş-şer‘î mâ-vaka‘a bi’t-taleb [ketb] olundu. Fi’l-yevmi’s-sânî min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-kuzât es-Seyyid Mehmed Efendi, Fahrü’l-kuzât Ömer Efendi, Fahrü’l-kuzât İbrahim Efendi, Mustafa Çelebi b. Hacı Musa, Sunullah Efendi b. Süleyman, el-Hâc Halil Efendi b. Mustafa, Mehmed b. Hüseyin, el-Hâc Hüseyin b. Abdülkerim, Mustafa b. Abdullah, Süleyman Beşe er-râcil, Mehmed b. Hacı Hüseyin, Babazâde İbrahim Beşe, Mehmed Beşe b. Hüseyin.