İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 614 Hüküm no: 707 Orijinal metin no: [90M/a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Abdullah’ın boşadığı karısı Alime ile mehir ve nafaka ve kayını Hüseyin ile alacak hususlarında sulh olduğu Mahmiye-i İstanbul’da Şeyh Vefa mahallesinde sâkin Mustafa b. Abdullah nâm kimesne mahfil-i kazâda Âlime ve Hüseyin ibney Abdülalim mahzarında ikrâr ve takrîr-i kelâm edip mezbûre Âlime bundan akdem zevcem olup tatlîk eylediğimde dört bin akçe mehr-i mü’ecceli ve nafaka-i iddet ve me’ûnet-i süknâsını benden da‘vâ ve taleb eylediğinde beynimizde münâza‘ât-ı kesîre cereyân etmekle iki bin akçe üzerine sulh olup ve bedel-i sulhu yedimden ahz u kabz edip bâkīsi olan akçeden zimmetimi ibrâ ve ıskāt eyledikden sonra yine mezbûre Âlime sekiz yüz [akçe] kıymetli bir kebe ve bir yorgan ve bir köhne velensemi ahz eyledin deyü benden da‘vâ ve taleb eyledikde onu dahi benimle dört yüz akçeye sulh olup ben dahi sulh-ı mezbûru kabûl ve bedel-i sulh olan meblağ-ı mezbûr dört yüz akçemi mezbûre Âlime yedimden ahz u kabz edip ve mezbûr Hüseyin bundan akdem fevt olan evlâdım Mehmed ve Hadice’nin techîz ve tekfînine emrim ile harc u sarf eylediği dokuz yüz elli akçeyi dahi mezbûr Hüseyin’e def‘ ü teslîm eyledim suâl olunup takrîrleri tahrîr olunması matlûbumdur dedikde gıbbe’s-suâl mezbûrân Âlime ve Hüseyin cevâblarında fi’l-vâki‘ kazıyye minvâl-i muharrer üzere olduğunu bi-tav‘ihimâ ikrâr ve i‘tirâf etmeğin mâ-vaka‘a bi’t-taleb ketb olundu. Fi’s-sâlis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdi Çelebi b. Hüseyin, Rasûl b. Rıdvan, Mustafa b. Mehmed el-muhzır, diğer Mustafa b. ( ) el-muhzır, Veli b. Mahmud, Mehmed b. el-Hâc Süleyman, Mehmed Çelebi b. Mehmed, Hasan Ağa b. ( ), Emirali b. ( )