İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 615 Hüküm no: 709 Orijinal metin no: [90b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Receb’in Osman Bey b. Abdullah’ta olan alacağını tahsil ettiği İsbât-ı edâ-i meblağ. Mahmiye-i İstanbul’da ( ) mahallesinde sâkin Yusuf b. Receb mahfil-i kazâda işbu bâ‘isü’l-kitâb Osman Bey b. Abdullah mahzarında üzerine da‘vâ ve takrîr-i kelâm edip mezbûr Osman Bey’e târih-i kitâbdan altı sene mukaddem bin dokuz yüz akçe ikrâz ve teslîm edip ol dahi iktirâz ve tesellüm eylemişdi hâlâ meblağ-ı mezbûru taleb ederim suâl olunsun dedikde gıbbe’s-suâl mezbûr Osman Bey cevâbında fi’l-vâki‘ müdde‘î-i merkūme vech-i mübeyyen üzere cihet-i mersûmeden bin dokuz yüz akçe deynim olup lâkin bundan akdem meblağ-ı mezkûru müdde‘î-i mezbûra def‘ ü teslîm edip ol dahi yedimden ahz u kabz eylediğini alâ-re’si’l-iştihâd ikrâr ve işhâd dahi eylemişdir deyü def‘le mukābele edecek gıbbe’l-istintâk ve akībe’l-inkâr mezbûr Osman Bey’den def‘-i mezbûrunu mübeyyine beyyine taleb olundukda udûl-i Müslimînden olup Ayasofya-i kebîr kurbünde Mi‘mârmescidi mahallesinde sâkin Mehmed Efendi b. Ömer ve Mustafa Çelebi b. Ahmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr bizim huzûrumuzda merkūm Osman Bey zimmetinde olan bin dokuz yüz akçeyi bi’t-tamam ve’l-kemâl ahz u kabz eyledim deyü ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın müdde‘î-i mezbûr bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâdis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: İsa Çelebi b. Bâyezid, Eyüb Efendi b. Seyfullah, es-Seyyid Mehmed b. Şaban, Mehmed Çavuş b. Mehmed el-mübâşir, Veli b. Mahmud.