İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 616 Hüküm no: 710 Orijinal metin no: [90b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Mahmud Efendi b. Mustafa’nın tasarrufunda bulunan vakıf menzili Dâye Kâmile bt. Abdullah’a 9.000 akçe bedel ile devrettiği Mahmiye-i İstanbul’da Yenibağçe kurbünde Nikola Çeşmesi kurbünde Karapaşo mahallesinde sâkine Dâye Kâmile bt. Abdullah nâm hatun meclis-i şer‘de işbu râfi‘u’l-kitâb Şeyh Mahmud Efendi b. Mustafa mahzarında ikrâr ve i‘tirâf edip mezbûr Şeyh Mahmud Efendi mahalle-i mezbûrede vâki‘ merhûm ( ) vakfından icâre-i mü’eccele ve mu‘accele-i ma‘lûmeteyn ile taht-ı tasarrufunda olan ma‘lûmü’l-hudûd menzili mukaddemâ ma‘rifet-i mütevellî ile bana dokuz bin akçe bedel-i makbûza ferâğ ve tefvîz ben dahi tefevvüz ve kabûl etmiş idim el-hâletü hâzihî bedel-i mezkûra ve târih-i kitâba gelince beynimizde vâkı‘a olan mu‘âmelâta müte‘allika mezbûr Şeyh Mahmud Efendi ile da‘vâ ve nizâ‘ım ve alâka ve medhalim yokdur da‘vâ dahi edersem lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Emrullah Ağa b. ( ), Hüseyin Efendi b. ( ), Mehmed Efendi b. İbrahim beyler sâkin-i Mahmudpaşa, Hasan Bey bevvâb-ı sultanî, Ali Çelebi el-müderris, Süleyman Ağa b. ( ), Mehmed Bey b. ( ).