İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 616 Hüküm no: 711 Orijinal metin no: [90b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Şeyh İsmail’in muhâlaa yoluyla kocası Rıdvan Bey b. Mehmed’den boşandığı Hul‘, ibrâ. Mahmiye-i İstanbul’da Sekbânbaşıı İbrahim Ağa mahallesi sâkinelerinden Havva bt. Şeyh İsmail nâm hatun tarafından hul‘-ı âti’l-beyânı ikrâra vekîl olup mezbûrenin zâtını ma‘rifet-i şer‘iye ile ârifân Receb Efendi b. Ahmed ve Yusuf Beşe b. Abdullah şehâdetleri ile şer‘an vekâleti sâbite olan sulbî kebîr oğlu Ahmed Çelebi b. Mehmed meclis-i şer‘de müvekkile-i mezbûrenin zevci işbu râfi‘u’l-kitâb Rıdvan Bey b. Mehmed mahzarında bi’l-vekâle ikrâr ve takrîr-i kelâm edip müvekkilem mezbûrenin zevci mezbûr Rıdvan Bey zimmetinde mütekarrir ve ma‘kūdün-aleyh olan sekiz bin akçe mehr-i mü’ecceli ve nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzere ve mezbûr Rıdvan Bey âhar diyârda iken müvekkilem mezbûrenin talebi ile kıbel-i şer‘den farz ve takdîr olunup târih-i kitâba gelinceye değin beher yevm yirmişer akçeden zimmetinde müctemi‘ olan yetmiş iki bin akçeden ve mezbûrun firâşından mütevellid sulbî sagīr oğlu Mustafa’nın dahi hakk-ı hıdânesi sâkıt oluncaya değin mâlından infâk ve iksâ etmek üzere mezkûr Rıdvan Bey ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete ve gayra müte‘allika cemî‘ de‘âvî ve mütâlebât ve eymân ve muhâsamâtdan her biri âharın zimmetini ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâmis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Bey b. Mehmed, Ömer Halîfe b. Abdullah el-müezzin, Mehmed Çelebi b. ( ) Çelebizâde, Şükrullah b. Mustafa, Abdi Çelebi b. Hüseyin.