İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 618 Hüküm no: 713 Orijinal metin no: [91a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ferhad Paşa Medresesi Vakfı’nın eski ve yeni müderris ve mütevellileri arasında devir-teslim işleminin gerçekleştiği Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi irsâl olunup ol dahi Dârü’l-hilâfeti’l-aliyye Kostantıniyyeti’l-mahmiye’de Yarhisar mahallesinde vâki‘ merhûm Osmanzâde Mahmud Efendi’nin menziline varıp zeyl-i rakīmde esâmîleri mastûr Müslimîn huzûrlarında akd-i meclis-i şer‘-i kavîm eyledikde merhûm-ı mezbûrun necl-i mükerremleri olup hâlâ mahmiye-i mezbûrede merhûm Ferhad Paşa Medresesi’ne müderris ve evkāfına mütevellî olan umdetü’l-müderrisîni’l-kirâm zübdetü’l-muhakkıkīni’l-fihâm Kemâleddin Efendi meclis-i mezbûrda sâbıkā medrese-i mezbûreye müderris ve evkāfına mütevellî olan işbu sedâd-intisâbın sahibi fahrü’l-müderrisîn zahru’l-müdekkıkīn Ahmed Efendi b. Abdurrahman mahzarında bi’t-tevliye ikrâr ve takrîr-i kelâm edip mezbûr Ahmed Efendi hîn-i tevliyetinde evkāf-ı mezbûreden olup Eski Oda başında vâki‘ ma‘lûmü’l-hudûd muhterik hânın nıkzını âhara yüz bin akçeye bey‘ ve semeni kabz ve arsasının hakk-ı tasarrufunu dahi altmış bin akçe icâre-i mu‘accele-i makbûza ve yevmî on akçe ücret-i maktû‘a ile îcâr eylemişdi el-hâletü hâzihî mezbûr Ahmed Efendi ma‘zûl ve ben yerine mütevellî olmağla cem‘an makbûzu olan meblağ-ı mezbûr yüz altmış bin akçeden on iki bin akçesini rehin ile Burhan Efendizâde İbrahim Efendi’den kabûl, bâkīsi olan yüz kırk sekiz bin akçeden kırk bin akçesi mukābelesinde üç bin iki yüz semeni ve elli yedi bin akçesi mukābelesinde dört yüz yetmiş beş esedî guruş ve otuz üç bin akçesi mukābelesinde dört yüz yirmi zolota guruş ve on üç bin dört yüz akçesi mukābelesinde altışar dirhem gelir yüz otuz dört riyâlî guruş ve yedi yüz yirmi akçesi mukābelesinde sekizer dirhem gelir altı riyâlî guruş ve iki yüz hurda akçe ki cem‘an mezbûr Ahmed Efendi yedinden yüz kırk sekiz bin akçeyi tevliyet-i mahkiyem hasebiyle ahz u kabz edip meblağ-ı mezbûr yüz altmış bin akçeden mezbûr Ahmed Efendi yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’s-sâdis ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Feyzullah Efendi el-müderris, Mehmed Efendi el-müderris, Mahmud Efendi el-müderris, Hüseyin Efendi b. Halil kâtib-i vakf-ı mezbûr, Davud Halîfe b. Mehmed, Hüseyin Efendi b. Mehmed.