İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 619 Hüküm no: 714 Orijinal metin no: [91a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikogos v. Maksud’un Rus asıllı kölesi Dilaver’i Salih Ağa’ya sattığı Fi’l-asl Vilâyet-i Anadolu’da medîne-i Âmid sâkinlerinden olup hâlâ mahmiye-i İstanbul’da Hoca Hanı’nda sâkin olan Nikogos v. Maksud nâm zimmî meclis-i şer‘de Osman Paşa kethudâsı Salih Ağa tarafından ikrâr-ı âti’l-beyânı tasdîka sâbitü’l-vekâle vekîl olan Ali Çelebi b. Ahmed mahzarında ikrâr ve takrîr-i kelâm edip müvekkil-i mezbûr Salih Ağa’ya açık kaşlı gök elâ gözlü Rusiyyü’l-asl Dilaver nâm abd-i memlûkümü tarafeynden îcâb ve kabûlü hâvî bey‘-ı bâtt-ı sahîh-i şer‘î ile altı bin râyic fi’l-vakt akçeye bey‘ ve teslîm ol dahi iştirâ ve kabûl ve tesellüm eyledikden sonra semeni olan meblağ-ı mezbûr altı bin akçeyi müvekkil-i mezbûr Salih Ağa yedinden tamamen ahz u kabz eyledim ba‘de’l-yevm mezbûr Dilaver müvekkil-i mezbûr Salih Ağa’nın abd-i memlûküdür benim alâka ve medhalim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâmis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Hacı Abdürrezzak b. Ali, Muslı Bey b. Ahmed, İbrahim Bey b. Ahmed, Abdurrahman b. Ali, Keşfî Mustafa Efendi, Şükrullah b. Mustafa, Veli b. Mahmud, Mehmed b. Ramazan, Rasûl b. Rıdvan.