İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 622 Hüküm no: 720 Orijinal metin no: [91b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Ayşe Hatun bt. Yusuf Efendi’ye ait Mollagürani çarşısındaki beş adet dükkânın varisleri tarafından Nisa Hatun’a satıldığı Vekâleten mübâya‘a-i dekâkîn. Medîne-i Eyyûb-i Ensârî mahallâtından Nişancı mahallesinde sâkine iken vefât eden Âişe Hatun bt. Yusuf Efendi’nin verâseti zevc-i metrûkü fahrü’l-kuzât Takizâde Abdurrahim Efendi b. Abdurrahman Efendi’ye ve sadrî kebîr oğulları Şeyh Mehmed Efendi ve Yahya ve kebîre kızı Safiye Hatun’a münhasıra oldukdan sonra mezbûr Yahya dahi kable’l-kısme vefât edip verâseti babası mezbûr Abdurrahim Efendi’ye münhasıra olduğu şer‘an zâhir ve mütebeyyin ve bâhir oldukdan sonra mezbûr Abdurrahim Efendi kendi tarafından asâleten ve kızı mezbûre Safiye tarafından vekîl olup mezbûrenin zâtını ma‘rifet-i şer‘iye ile ârifân olan Ahmed b. Mahmud ve Receb b. Muharrem şehâdetleri ile şer‘an vekâleti sâbite olmağın vekâleten ve mezbûr Şeyh Mehmed Efendi asâleten meclis-i şer‘de işbu râfi‘atü’l-vesîka Macuncu mahallesinde sâkine Nisa Hatun bt. Mehmed tarafından husûs-ı câ’i’z-zikre vekîl olup zât-ı mezbûreyi ma‘rifet-i şer‘iye ile ârifân olan Ahmed Çelebi b. Hüseyin ve Yusuf b. Abdullah şehâdetleri ile şer‘an vekâleti sâbite olan zevci Receb Beşe b. İbrahim mahzarında her biri ikrâr ve takrîr-i kelâm edip mahmiye-i mezbûrede Monla Gürânî sükûnda vâki‘ bir tarafdan Hasan Bey kızı Âişe Hatun ve ba‘zan Çorbacızâde Mehmed Efendi mülklerine ve bir tarafdan Usta Rıdvan mülküne ve iki tarafdan tarîk-i âmma müntehî biri birine muttasıl bir bâb camcı ve bir bâb kalaycı ve bir bâb çömlekci ve bir bâb sarrâc ve bir bâb hayyât dükkânlarını mûrisemiz müteveffât-ı ûlânın ile’l-vefât mülkü olup ba‘de vefâtihâ ırsen bize intikāl etmişken ilâ-hîn-i sudûrı hâze’l-akd müşâ‘iyet üzere mutasarrıflar idik el-hâletü hâzihî zikrleri sebk eden beş bâb dükkânları asâlet ve vekâletimiz hasebiyle mezbûr Receb Beşe’ye elli beş bin akçeye bâtten bey‘ ve teslîm ol dahi zevcesi müvekkile-i mezbûre için müvekkilesi mâlıyla iştirâ ve tesellüm ve kabûl eyledikden sonra semeni olan meblağ-ı mezbûr elli beş bin akçeyi bi’t-tamam ve kemâl mezbûr Receb Beşe yedinden alıp kabz eyledik ba‘de’l-yevm mârrü’z-zikr dükkânlar mezbûre Nisa Hatun’un mülk-i müşterâsıdır keyfe mâ teşâ’ ve tahtâr mutasarrıfe olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed Efendi el-imâm, Hüseyin Çelebi b. Sinan el-müezzin, Ahmed Çelebi el-müezzin, İsmail Çelebi b. Süleyman el-müezzin, Yusuf b. Abdullah, Hüseyin Efendi b. Şaban, Mehmed Bey el-hayyât, Ahmed b. Hüseyin, Siyavuş b. Abdullah, Hasan b. Hüseyin, el-Hâc İbrahim el-münâdî.