İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 623 Hüküm no: 721 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı İvaz b. Abdullah’ın Sefer Beşe b. Receb’e Gül Camii mahallesindeki arsasını satıp arsanın bitişiğindeki menzilinin de kullanım hakkını devrettiği Ferâğ-ı menzil. Mahmiye-i İstanbul’da Gül Câmi‘-i Şerîfi mahallesinden el-Hâc İvaz b. Abdullah tarafından husûs-ı âti’z-zikre vekîl olup İsmail b. Mehmed el-imâm ve Abdülkerim Efendi b. İbrahim el-müezzin şehâdetleri ile şer‘an vekâleti sâbite olan el-Hâc Mehmed Beşe b. Durmuş meclis-i şer‘de işbu bâ‘isü’l-kitâb Sefer Beşe b. Receb mahzarında bi’l-vekâle ikrâr ve i‘tirâf edip müvekkilim mezbûrun silk-i mülk-i sahîhinde münselik olup mahalle-i mezbûrede vâki‘ iki tarafdan Sirkeci Seyyid İsmail Vakfı’na ve bir tarafdan ba‘zan el-Hâc Mehmed kızı Fâtıma Hatun mülküne ve ba‘zan yine vakf-ı mezbûra ve bir tarafdan tarîk-i âmma müntehî tûlen otuz bir buçuk arzan yedi be-hesâb-ı şatrancî iki yüz yetmiş zirâ‘ arsa-i hâliyeyi bi-cümleti’t-tevâbi‘ ve’l-levâhık mezbûr Sefer Beşe’ye vekâleten on yedi bin akçeye bâtten bey‘ ve teslîm ol dahi iştirâ ve kabûl ve kabz eyledikden sonra müvekkilim mezbûrun merhûm Sirkeci Seyyid İsmail Vakfı’ndan icâre-i mu‘accele ve yevmî bir akçe ücret-i mü’eccele ile taht-ı tasarrufunda olup zikri mürûr eden arsaya muttasıl iki tarafı el-Hâc Mehmed kızı mezbûre Fâtıma Hatun mülküne ve bir tarafı tarîk-i hâssa ve bir tarafı arsa-i mezbûreye müntehî iki bâb fevkānî odayı ve sofayı ve bir bâb tahtânî oda ve sofa ve su kuyusunu ve kenîfi müştemil vakıf menzilin hakk-ı tasarrufunu ma‘rifet-i mütevellî-i vakf-ı mezbûr ile on iki bin akçe bedel mukābelesinde mezbûr Sefer Beşe’ye vekâleten ferâğ ve tefvîz ol dahi ber-vech-i muharrer tefevvüz ve kabûl eyledikden sonra semen-i mezbûr on yedi bin akçe ve bedel-i mezkûr on iki bin akçe ki cem‘an yirmi dokuz bin akçemi mezbûr Sefer Beşe yedinden bi’t-tamam ve’l-kemâl vekâletim hasebiyle ahz u kabz eyledim dedikde gıbbe’t-tasdîk mezbûr el-Hâc Mehmed Beşe’ye meclis-i mezbûrda menzil-i mezbûrun derkine kefâlet-i sahîha-i şer‘iye ile kefîl oldum dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Şevvali’l-mükerrem sene 1072. Şuhûdü’l-hâl: Abdi b. Hüseyin, Hasan b. Bayram, Mehmed b. Muslı, Ahmed b. Mehmed, Rasûl b. Rıdvan, Hüseyin b. Rıdvan, İbrahim b. Mehmed, Nasuh Beşe b. ( ).