İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 633 Hüküm no: 734 Orijinal metin no: [93b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan Beşe b. Ramazan’ın Neslişah Sultan mahallesindeki menzilini Ahmed Ağa b. Yakub’a sattığı Mülknâme. Dârü’l-hilâfeti’l-aliyye Kostantıniyyeti’l-mahmiye’de Çavuşmescidi mahallesinde sâkin Ramazan Beşe b. Ramazan meclis-i şer‘de hâlâ koyun emîni olan umdetü’l-a‘yân işbu râfi‘u’l-kitâb Ahmed Ağa b. Yakub tarafından ikrâr-ı âti’z-zikri tasdîka sâbitü’l-vekâle vekîl olan Ahmed Beşe b. Mehmed mahzarında ikrâr ve i‘tirâf edip silk-i mülkümde münselik olup mahmiye-i mezbûrede Neslişah Sultan mahallesinde vâki‘ bir tarafı Kasım Bey b. Abdullah menziline ve bir tarafı Râziye Hatun menziline ve bir tarafı Medîne-i Münevvere Vakfı’na ve bir tarafı tarîk-i âmma müntehî iki bi’r-i mâ’i ve zât-ı eşcâr-ı müsmire ve gayr-ı müsmire bahçe ta‘bîr olunur menzilimi mûmâ-ileyh Ahmed Ağa’ya bâtten yirmi yedi bin akçeye bey‘ ve teslîm ol dahi ber-minvâl-i muharrer iştirâ ve kabûl ve kabz ve tesellüm eyledikden sonra semeni olan meblağ-ı mezbûr yirmi yedi bin akçeyi mezbûr Ahmed Ağa yedinden bi’t-tamam ve’l-kemâl ahz u kabz eyledim ba‘de’l-yevm menzil-i mezbûr ve iki bi’r-i mâ’ merkūm Ahmed Ağa’nın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed Ağa çorbacı, Mehmed Ağa b. Mustafa çorbacı, Osman Beşe b. Ramazan, Ahmed Yazıcı b. Ali, Ahmed Çelebi b. Abdullah, Abdi b. Hüseyin, Şükrullah b. Mustafa, Mehmed b. Ramazan.