İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 633 Hüküm no: 735 Orijinal metin no: [93b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdüllatif Efendi’nin Kadızâde Mehmed Efendi Vakfı’ndan aldığı borcu ödemesi üzerine rehine koyduğu menzilinin kendisine iade edildiği Fekk-i rehin. Husûs-ı âti’l-beyânın mahâllinde tahrîri iltimâs olunmağın kıbel-i şer‘den Mevlânâ Burûsî Hüseyin Efendi irsâl olunup ol dahi mahmiye-i İstanbul’da Hoca Hayreddin mahallesinde sâkin umdetü’l-mevâli’l-kirâm zübdetü’l-ulemâ’i’l-izâm yenbû‘u’l-fezâili’l-meâli ve yenbû‘u’l-efâzıl ve’l-e‘âlî âlemü’l-ilm ve’l-hüdâ menârü’l-fazl ve’t-tukā hâlâ Şâm-ı şerîf-i cennet-meşâm kādısı menzil-i âlîlerine varıp zeyl-i kitâbda isimleri mastûr Müslimîn huzûrunda akd eylediği meclis-i şer‘de Dârü’s-sa‘âde ağası nezâretlerinde olan evkāfdan Kādızâde Mehmed Efendi Vakfı’na hâlâ mütevellî olan Abdüllatif Efendi b. Mehmed Dede, mûmâ-ileyh Abdüllatif Efendi hazretleri huzûrunda bi’t-tevliye ikrâr ve takrîr-i kelâm edip mûmâ-ileyh efendi hazretleri târih-i kitâbdan bir sene mukaddem bin yetmiş bir senesi Zilka‘de gurresinde vakf-ı mezbûra mütevellî olan Kapıcı Yusuf Çelebi b. Abdullah’dan her biri yedişer dirhem olmak üzere mal-ı vakf-ı mezbûrdan yedi yüz riyâlî guruş karz alıp ve onu on bir buçuk hesâbı üzere mu‘âmele-i şer‘iye ile bir senede yüz beş kıt‘a riyâlî guruş rıbh iltizâm olunmağla cem‘an asl-ı mâl [ve] ribhde mûmâ-ileyh efendi hazretleri zimmetlerinde sekiz yüz beş riyâlî guruş deyn olmuş idi el-hâletü hâzihî yedi yüz guruş asl-ı mâl ile yüz beş guruş rıbh ki cem‘an seksen beş riyâlî guruşu yedinden bi’t-tamam ve’l-kemâl tevliyetim hasebiyle alıp kabz eyledim zimmetlerinde asıl [ve] rıbhdan bir nesne bâkī kalmadı ve oturdukları menzil meblağ-ı mezbûr mukābelesinde rehin olmağla meblağ-ı mezbûru alıp fekk-i rehin edip kendilere teslîm onlar dahi tesellüm eylediler dedikde gıbbe’t-tasdîkı’l-mu‘teber ve vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mehmed b. Mahmud ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. [94a] Fi’l-yevmi’t-tâsi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-müderrisîn Mahmud Efendi b. Mehmed Efendi, Fahrü’l-kuzât Ahmed Efendi b. Şeyh Sinan, el-Hâc Hamzazâde Mehmed elebi Tekürdağı’ndan, Câbî-i vakf es-Seyyid Hüseyin b. el-Hâc Mehmed eş-Şâmî.