İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 634 Hüküm no: 736 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Ali’nin Hacı Ali b. Hacı Hasan tarafından evine bıçaklı saldırı yapıldığını şahitlerle ispat ettiği Yalın bıçak evime girdi deyü da‘vâyı isbât. Mahmiye-i İstanbul’da Derviş Ali mahallesinde sâkin işbu bâ‘isü’l-kitâb Mehmed Beşe b. Ali mahfil-i kazâda el-Hâc Ali b. el-Hâc Hasan mahzarında üzerine da‘vâ ve takrîr-i kelâm edip merkūm el-Hâc Ali târih-i kitâbdan yirmi iki gün mukaddem kable’z-zuhr benim sâkin olduğum menzilim kapısına gelip depme ile kapımı açıp elinde yalın bıçak ile haremime girip ehl ü ıyâlim feryâd etmekle yine haremimden çıkıp gitmişdir hâlâ mezbûrdan suâl olunup mûcebi icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup mahalle-i mezkûre sükkânından Mehmed Çelebi b. Ahmed el-müezzin ve Hasan Çelebi b. Mehmed nâm kimesne li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka târih-i mezkûr günü re’yü’l-ayn gördük biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerine gıbbe ri‘âyeti şerâ’iti’’l-kabûl şehâdetleri makbûle olmağın mâ hüve’l-vâki‘ bi’t-taleb ketb olundu. Fi’l-yevmi’s-sâmin min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Efendi b. Abdullah el-imâm, Ahmed Beşe b. Oruc el-mübâşir, Mehmed Çavuş b. Mustafa Çavuş, Şahin Beşe b. Abdullah, İsmail Çelebi b. ( ), Sefer Efendi b. ( ), Osman Çelebi b. ( ).