İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 635 Hüküm no: 737 Orijinal metin no: [94a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdullah’ın merhum kocası Veli Paşa’nın terekesinden mehir ve miras hissesini alıp diğer varislerin zimmetlerini ibra ettiği Sagīreynin zimmetlerini da‘vâdan ibrâ. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi irsâl olunup ol dahi mahmiye-i İstanbul’da Hoşkadem mahallesinde sâkin fahrü’l-emâcid ve’l-e‘âlî câmi‘ü’l-mehâmid ve’l-meâli İsmail Ağa b. Ali’nin menziline varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde mahmiye-i mezbûrede Cezerî Kasım Paşa mahallesi sükkânından olup Akkirman’da vefât eden merhûm Veli Paşa’nın verâseti zevce-i metrûkeleri Fâtıma Hanım bt. Abdullah ve Âtike Hatun’a ve sulbî sagīr oğlu Mehmed Bey ile sulbiye sagīre kızı Fâtıma Hanım’a münhasıra olduğu şer‘an zâhir ve mütehakkık oldukdan sonra zevcesi mezbûre Fâtıma Hanım tarafından husûs-ı câ’i’z-zikre vekîl olup zât-ı mezbûreyi ma‘rifet-i şer‘iye ile ârifân olan Halil Bey b. Ahmed ve Ebûbekir Bey b. Ali şehâdetleri ile şer‘ an vekâleti sâbite olan fahrü’l-akrân Ömer Ağa b. Mehmed el-muhâmî meclis-i ma‘kūd-ı mezbûrda sagīrân-ı mezbûrânın kıbel-i şer‘den tesviye-i umûrlarına vasîleri ve ammileri olmağla müteveffâ-yı mezbûrun terekesine vâzı‘u’l-yed idiği şer‘an sâbit olan mûmâ-ileyh İsmail Ağa mahzarında bi’l-vekâle ikrâr ve takrîr-i kelâm edip müvekkilem hânım-ı merkūmenin nısf-ı sümün hissesi ve zevci müteveffâ-yı mezbûr zimmetinde mütekarrir yüz altmış bin akçe karz ve yüz yirmi bin akçe mehr-i mü’eccel mukābelelerinde her kîsesi kırk bin akçeden beş kîse içinde iki yüz bin akçeyi müteveffâ-yı mezbûrun terekesinden olmak üzere vasîyy-i mûmâ-ileyh İsmail Ağa yedinden vekâletim hasebiyle kabz eylediğimden sonra müvekkilem hânım-ı mezbûrenin zevci müteveffâ-yı mezbûra zikrolunan Cezerî Kasım Paşa mahallesinde vâki‘ menzil duvarlarını binâ için teslîm eylediğim ma‘lûmü’l-mikdâr akçe husûsuna ve Şam’da olan terekesine müte‘allika âmme-i de‘âvîden sagīreyn-i mezbûreynin zimmetlerini müvekkilem merkūme Fâtıma Hanım ibrâ-i âm ile ibrâ ve ıskāt eyledi ba‘de’l-yevm husûs-ı mezbûra müte‘allika müvekkilemin da‘vâdan nizâ‘ı kalmadı dedikde mukırr-ı mezbûru bi’l-vekâle cârî ve sâdır olan ikrâr-ı muharrerinde vasîyy-i mûmâ-ileyh İsmail Ağa bi’l-muvâcehe tasdîk eylediğini mevlânâ-yı mezbûr vâki‘ hâli mahâllinde tahrîr ba‘dehû ma‘an ba‘s olunan Mehmed b. Ramazan ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ekmelü’l-müderrisîn Tosyavî Mehmed Efendi, Fahrü’l-müderrisîn Cafer Efendi, Ahmed Efendi b. Bali, Hoca Mehmed Efendi, İsmail Bey b. İbrahim, Mehmed Efendi b. Abdülkerim, Mehmed Efendi el-imâm, Ömer Ağa b. Receb.