İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 636 Hüküm no: 738 Orijinal metin no: [94a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Ömer’in Gürci asıllı kölesi Mirza’yı azat ettiği Itknâme. Vilâyet-i Anadolu’da Sivas Sancağı’nda vâki‘ Dârende nâm kasaba a‘yânından olup hâlâ mahmiye-i İstanbul’da Fenerkapısı kurbünde sâkin Ahmed Ağa b. Ömer nâm kimesne meclis-i şer‘-i hatîr-i lâzımü’t-tevkīrde sâbıkā kendiye rıkkını mu‘terif olan işbu orta boylu açık kaşlı kara elâ gözlü alnının sol tarafında eser-i cerhi olan Gürciyyü’l-asl bâ‘isü’l-vesîka Mirza b. Abdullah nâm gulâmı târih-i kitâbdan üç sene mukaddem bana üç sene hizmet edip ba‘dehû âzad olmak üzere kitâbete kat‘ eylemişdim el-hâletü hâzihî mezbûr Mirza üç sene kâmilen bana hizmet etmekle müddeti tamam olmuşdur ba‘de’l-yevm mezbûr Mirza sâir ahrâr-ı asliyyîn gibi hür olup üzerinde velâdan gayrı hakkım kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Ramazani’l-mübârek li-sene isneteyn ve seb‘în ve elf. Şuhûdü’l-hâl: Mustafa Bey el-cündî, Hamza Bey el-cündî, Ebûbekir Efendi b. Hamza, Hasan b. Mehmed, Abdülvehhab b. Hamza.