İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 642 Hüküm no: 748 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mustafa Bey b. Mehmed’in iki adet menzilin babası tarafından kendisine hibe edildiğini şahitlerle ispat ettiği İsbât-ı hîbe-i menzil. Mahmiye-i İstanbul’da Topkapısı dâhilinde Bâyezid Ağa mahallesinde sâkin işbu râfi‘u’l-kitâb el-Hâc Mustafa Bey b. Mehmed meclis-i şer‘-i hatîrde zikirleri câ’î iki bâb vakıf menzile mütevellî olan Hamza Dede b. Ali nâm kimesne mahzarında üzerine da‘vâ ve takrîr-i kelâm edip mahalle-i mezbûrede vâki‘ bir tarafdan Mustafa Ağa mülküne ve iki tarafdan Mehmed Bey b. Abdullah mülküne ve bir tarafdan tarîk-i âmma müntehî bir beyt-i süflî ve bir sofa-i süfliyye ve kenîfi müştemil menzil ve yine menzil-i mezbûr kurbünde vâki‘ iki tarafdan Mehmed Bey b. Abdullah mülküne ve bir tarafdan İbrahim Ağa mülküne ve bir tarafdan tarîk-i âmma müntehî bir beyt-i süflî ve bir sofa-i süfliyye ve kenîfi müştemil “başoda” ta‘bîr olunur bir menzil babam Mehmed Bey b. Abdullah’ın mülkünde iken bundan akdem bin kırk târihinde te’ehhül eylediğimde menzileyn-i mezbûreyn ba‘de’t-tahliyeti’ş-şer‘iye bana hîbe ve temlîk ve teslîm ve ben dahi meclis-i hîbede ittihâb ve temellük ve tesellüm ve kabûl edip yirmi yedi sene menzileyn-i mezbûreyin içlerinde sâkin ve mutasarrıf olup mülk-i mevhûbum oldukdan sonra yine âhar diyârda iken babam bin altmış yedi Şevval’inde menzil-i evveli vakf edip süknâsını evvelâ kendi nefsine ba‘dehû ayda yirmi beş akçe ücretle îcâr olunup ücret-i mezbûreden her ayda yirmi akçesi Bâyezid Ağa Câmi‘i’nde kayyûm olan kimesneye verilip bâkī beş akçesi imâret ve meremetine sarf oluna deyü vakf ve şart eylediğini ol zamanda Davud Paşa Mahkemesi’nde nâibü’ş-şer‘ olan Mehmed Efendi b. Mahmud huzûrunda ikrâr ve tescîl ve başoda ta‘bîr olunan menzil-i mezbûru vakf edip evvelâ utekāsından Davud b. Abdullah mutasarrıf ola ba‘dehû evlâdı ve evlâd-ı evlâdı batnen ba‘de batnin sâkin ve ba‘de inkırâzı’l-evlâd mahalle-i mezbûre avârızına sarf oluna deyü vakıf ve şart eylediğini yine altmış yedi senesi Recebi’l-ferd’inde Ahî Çelebi Mahkemesi’nde nâibü’ş-şer‘ olan Ali Efendi b. Mehmed Efendi huzûrunda ikrâr ve tescîl ve vakfiyetine hükmolunmuşdur deyü mezbûr Hamza Dede menzileyn-i mezbûreyn vakıf olmak üzere vaz‘-ı yed eylediğini ikrâr lâkin babası vâkıf-ı mezbûr vakf etmezden yirmi yedi sene mukaddem oğlu müdde‘î-i mezbûr minvâl-i muharrer üzere ba‘de’t-tahliyeti’ş-şer‘iye hîbe ve temlîk ve teslîm eylediğini inkâr edicek müdde‘î-i mezbûr Mustafa Bey’den müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup zikrolunan Bâyezid Ağa mahallesi sükkânından Mahmud Bey b. Yusuf ve Murtaza Halîfe b. Muharrem nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mahalle-i mezbûrede vâki‘ bir tarafdan Mustafa Ağa mülküne ve iki tarafdan Mehmed Bey b. Abdullah mülküne ve bir tarafdan İbrahim Ağa mülküne ve bir tarafdan tarîk-i âmma müntehî bir beyt-i süflî ve bir sofa-i süfliyye ve kenîfi müştemil menzil ile menzil-i mezbûr kurbünde vâki‘ iki tarafdan mezbûr Mehmed Bey mülküne ve bir tarafdan İbrahim Ağa mülküne ve bir tarafdan tarîk-i âmma müntehî beyt-i süflî ve bir sofa-i süfliyye ve kenîfi müştemil başoda ta‘bîr olunur menzile mâlik olan müdde‘î-i mezbûrun babası Mehmed Bey’in mülkünde olduğu hâlde bin kırk târihinde oğlu müdde‘î-i mezbûr Mustafa Bey’e hîn-i te’ehhülünde bizim huzûrumuzda ba‘de’t-tahliyeti’ş-şer‘iye hîbe ve temlîk ve teslîm ol dahi meclis-i hîbede ittihâb ve tesellüm ve temellük ve kabûl eyledikden sonra yirmi yedi sene menzileyn-i mezbûreyni mutasarrıf oldu biz bu vech üzere menzileyn-i mezbûreyni târih-i mezkûrdan beri müdde‘î-i mezbûrun mülk-i mevhûbu olduğuna şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâdis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Efendi el-imâm, Ali Beşe b. Mustafa, Mustafa b. Mustafa el-hallâk, Receb Çelebi b. Abdullah na‘lbend, Hüseyin Çelebi el-müezzin, Şükrullah b. Mustafa.