İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 643 Hüküm no: 749 Orijinal metin no: [95b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Valide Sultan’a ait mülk binalı arsanın Kamer Hatun Vakfı’na ait arsa ile değiştirilmesi İstibdâl. Mahrûse-i Galata’ya tâbi‘ kasaba-ı Kasımpaşa’da merhûm Kamer Hatun Evkāfı’na bi’l-fi‘il mütevellî olan Mehmed Çelebi b. Ali meclis-i şer‘de işbu bâ‘isü’r-rakīm Ali Çelebi b. Handan mahzarında ikrâr ve i‘tirâf edip vakf-ı mezbûrdan olup mahmiye-i İstanbul’da Adliye Câmi‘-i Şerîfi kurbünde vâki‘ ma‘lûmü’l-hudûd Yahûdihâne icâre-i mu‘accele ve mü’eccele-i ma‘lûmeteyn ile mezbûr Ali Çelebi’nin taht-ı tasarrufunda iken bin yetmiş senesi Zilka‘desi’nin on altıncı gününde vâki‘ olan harîk-i ekberde bi-emrillâhi te‘âlâ muhterik olup arsa-i sırfa kaldıkda arsa-i mezbûre Sultanü’l-muhadderât bürhânü’l-muvakkarât aliyyetü’z-zât safiyyetü’s-sıfât Vâlide Sultan -dâmet ismetuhâ- hazretlerinin müceddeden binâ eyledikleri sâlifü’z-zikr Adliye Câmi‘-i Şerîfi kurbünde olmağla Sultan -ı müşârün-ileyhâ hazretlerine taraf-ı saltanat-ı aliyyeden temlîk olunup mahrûse-i mezbûrede Karaköy Kapısı dâhilinde Marya Kenîsesi demekli ma‘rûfe kenîsenin önünde binâ olunmuş beş bâb dükkân ve üzerinde iki buçuk oda ve kenîse-i mezkûrenin binâ olunmuş duvarları ve arsasının nıkzı be-hesâb-ı terbî‘î beş yüz doksan zirâ‘ binâlı arsa ile yine mahrûse-i mezbûrede Meydâncık nâm mevzi‘de ma‘lûmü’l-hudûd yüz seksen zirâ‘ arsa-i sâlifü’z-zikr Yahûdihâne arsası ile bâ-emr-i âlî istibdâl olunup bedel verilmiş idi el-hâletü hâzihî zikrolunan beş yüz doksan zirâ‘ arsa üzerine binâ olunmuş beş bâb dükkân ve üzerine iki buçuk oda ve kenîse-i mezbûrenin binâ olunmuş taş duvarları ve arsasının nıkzı ve zîr-i olunan Meydâncık nâm mevzi‘de olan yüz seksen zirâ‘ arsayı yine ke’l-evvel yevmî on akçe ücret-i mü’eccele ile îcâr ol dahi vech-i muharrer üzere istîcâr ve kabûl eyledikden sonra zikrolunan Yahûdîhâne üzerinde mevcûd olan pencere demirleri dokuz bin beş yüz akçeye bey‘ olunup meblağ-ı merkūm Ali Çelebi’ye istîcâr eylediği yerlere sarf etmek için teslîm ol dahi kabz edip yedine hat ve hâtemimi hâvî temessük vermişimdir dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâmis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdi Çelebi b. Hüseyin, Şükrullah b. Mustafa, Mehmed b. Ramazan, Hüseyin Efendi b. Abdülfettah, İbrahim Çelebi b. İsmail.