İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 649 Hüküm no: 761 Orijinal metin no: [97a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Üveys Ağa’nın oğlu Mustafa Bey’in alacağını ödemesi için Sâkine bt. Hüseyin’e süre verdiği İmhâl. Sâbıkā hâssa helvâcıbaşı olup ba‘dehû vefât eden Üveys Ağa’nın sulbî sagīr oğlu Mustafa Bey’in vasîyy-i muhtârı Şehsüvar Bey b. Abdullah meclis-i şer‘de Sâkine Hatun bt. Hüseyin tarafından da‘vâ-yı âtiyyetü’l-husûmet ve redd-i cevâba vekîl olup zâtını ma‘rifet-i şer‘iye ile ârifân İmâm Mehmed Efendi ve Abdülbaki b. Ömer nâm kimesneler şehâdetleri ile şer‘an vekâleti sâbite Müderris Sefer Efendi b. Mehmed mahzarında üzerine da‘vâ ve takrîr-i kelâm edip müvekkilem merkūme Sâkine Hatun’a sagīr-i mezbûr mâlından ikrâz ve teslîm eylediğim üç yüz riyâlî guruşu onu on bir buçuk hesâbı üzere senede kırk beşer riyâlî guruş vermek üzere dört sene mukaddem müvekkile-i merkūme Sâkine Hatun’a devr-i şer‘î ile ilzâm-ı rıbh edip asl-ı mal-ı mezbûr ile dört sene müctemi‘ olan yüz seksen riyâlî guruş fâideyi müvekkile-i merkūmeden taleb ederim vekîl-i mezbûr Sefer Efendi’den suâl olunsun dedikde gıbbe’s-suâl mezbûr Sefer Efendi cevâbında fi’l-vâki‘ müvekkilem mezbûr zimmetinde olan üç yüz riyâlî guruşu ber-minvâl-i muharrer altı ay tamamına değin yirmi iki buçuk riyâlî guruş rıbh vermek üzerine müvekkile-i merkūme üzerine devr-i şer‘î ile ilzâm-ı rıbh edip meblağ-ı mezbûr asl-ı mâl ile yirmi iki buçuk riyâlî guruş ribh-i deyni vardır deyip müvekkile-i merkūme zimmetinde üç yüz riyâlî guruş deyni olduğunu ikrâr mâ‘adâ yüz altmış iki buçuk riyâlî guruşun ber-minvâl-i muharrer devr-i şer‘î ile müvekkilesi üzerine lâzım geldiğini inkâr eyledikde müdde‘î-i mezbûr Şehsüvar Bey’den müdde‘âsı için beyyine taleb olundukda ityân-ı beyyine için istimhâl etmeğin mehl-i şer‘î ile imhâl olunup mâ hüve’l-vâki‘ bi’t-taleb ketb olundu. Fi’l-yevmi’s-sâmin min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Receb Çavuş el-mübâşir, Hüseyin Efendi el-Burûsî, Muslı Bey b. İbrahim, Eyyûbî Mehmed Beşe b. ( ) er-râcil, Şükrullah b. Mustafa, Abdi Çelebi b. Hüseyin, Rasûl b. Rıdvan, Mustafa b. Abdi.