İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 650 Hüküm no: 762 Orijinal metin no: [97a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Mehmed, Dimo v. Zito ve Mosko v. Dimo adlı kasapların yağ bedelinden Hıristo v. Todoş zimmetindeki alacaklarını tahsil ettikleri Husûs-ı âti’l-beyânın mahâllinde tahrîri iltimâs olunmağın cânib-i şer‘den Mevlânâ Ahmed Efendi irsâl olup ol dahi zeyl-i kitâbda mastûrü’l-esâmî Müslimîn huzûrunda mahmiye-i İstanbul’da Balat Kapısı hâricinde vâki‘ Kürkcüoğlu Hıristo nâm zimmînin mumhânesine varıp akd-i meclis-i şer‘ eylediğinde yine mahmiye-i mezbûrede kasab tâifesinden Ali Beşe b. Mehmed kendi tarafından asâleten ve gāib ani’l-meclis matbah emîni olan umdetü’l-emâcid ve’l-ekârim Yusuf Efendi tarafından sâbitü’l-vekâle ikrâra vekîl olup vekâleten ve Dimo v. Zito ve Mosko v. Dimo nâm kasablar her biri meclis-i mezbûrda yine mârrü’z-zikr mumhânede usta olan işbu râfi‘u’s-sifr diğer Hıristo v. Todoş nâm zimmî muvâcehesinde her biri asâleten ve vekâleten ikrâr ve takrîr-i kelâm edip mum yağı bahâsından olup beher vakıyyesi on ikişer akçeye olmak üzere ba‘de küllî hesâb mezbûr Hıristo zimmetinde cem‘an otuz dokuz bin iki yüz seksen altı akçeye hakkım müctemi‘ olmağla meblağ-ı mezbûru mezbûr Hıristo yedinden bi’t-tamam ve’l-kemâl alıp kabz eyledik dediklerinde mukırrûn-ı mezbûrûnun bi’l-vekâle ve bi’l-asâle cârî ve sâdır olan ikrârlarını mevlânâ-yı mezbûr mahâllinde tahrîr ba‘dehû ma‘an irsâl olunan Abdi Çelebi b. Hüseyin ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: İbrahim Ağa b. Ömer kethudâ-yı kassabân, Hasan Ağa b. Salih el-mübâşir, Mehmed Çelebi b. Hasan, Arslan Beşe b. Muharrem kethudâ-yı mumcuyân, Hasan Bey b. Abdi.