İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 652 Hüküm no: 764 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey b. Bali ile kardeşi Mümine’nin tasarruflarında olan vakıf odaların arasına tahta havlu yapılması için mahallinde keşif yapıldığı Keşif. Mahmiye-i İstanbul’da Nahılbend mahallesi sükkânından Ahmed Bey b. Bali nâm kimesne meclis-i şer‘de takrîr-i kelâm edip mahalle-i mezbûrede vâki‘ merhûm Hayyât Hamza Vakfı’ndan olup gallesi mahalle-i mezbûre imâmına ve mü’ezzinine meşrûta olan müte’ehhilîn odalarında bir bâb odaya icâre-i mu‘accele ve beher şehr otuz akçe ücret-i mü’eccele ile tasarrufumda olup ve bir bâb odasında dahi minvâl-i muharrer üzere kız karındaşım Mümine Hatun mutasarrıfe olmağla mârrü’z-zikr odaların beyninde duvar olmayıp iştirâken tahta havlu binâ etmek üzere her birimiz râzı olmuşuzdur kıbel-i şer‘den mârrü’z-zikr odaların üzerlerine varılıp ba‘de’n-nazar tahrîr olunması matlûbumdur dedikde savb-ı şer‘den Mevlânâ Mehmed Efendi irsâl olunup ol dahi hâssa mi‘mârlardan Üstâd Hüseyin b. Abdullah ve Ali Halîfe ile zikrolunan odaların üzerine varıp mütevellîsi olan el-Hâc Dilaver Çavuş huzûrunda ba‘de’l-keşf ve’n-nazar mezbûre Mümine ber-vech-i iştirâk tahta havlu etmek üzere râziye ve müte‘ahhide olmağın vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hasan b. Hüseyin ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’s-sâbi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mefharu’l-a‘yân İshak Efendi b. eş-Şeyh İbrahim Efendi, Abdurrahman Çavuş b. Abdullah, Rahmetullâh Halîfe b. Mustafa el-müezzin, Mehmed b. Abdullah, Mustafa Çavuş b. Nasuh, İslam Çavuş b. Abdullah.