İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 653 Hüküm no: 765 Orijinal metin no: [97b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hasan Beşe b. Mahmud’un vakıf arsa üzerindeki mülk menzilini Ahmed Ağa b. İsa Bali’ye sattığı ve menzilin arsasını da ücretsiz olarak devrettiği Mübâya‘a ve izn-i mütevellî ile vakıf arsayı meccânen ferâğ. Mahmiye-i İstanbul’da Macuncu kurbünde Sarrâc Doğan mahallesinde sâkin el-Hâc Hasan Beşe b. Mahmud meclis-i şer‘de işbu bâ‘isü’l-kitâb Ahmed Ağa b. İsa Bali mahzarında ikrâr ve takrîr-i kelâm edip mahalle-i mezbûrede vâki‘ bir tarafı mahalle-i mezbûre mescid-i şerîfi vakfından olup Ali Beşe tasarrufunda olan menzile ve bir tarafı mahalle-i mezbûre mü’ezzinine meşrûta olan vakıf menzile ve bir tarafı Hasan Efendi Vakfı’ndan olan menzile ve bir tarafı tarîk-i âm ile mahdûd arsasının senede Sarrâc Musa Vakfı’na otuz akçe mukāta‘ası olup bir bâb fevkānî oda ve bir fevkānî dehliz ve iki bâb tahtânî oda ve bir sofa ve kenîf ve zât-ı eşcâr-ı müsmire ve gayr-ı müsmire bahçeyi müştemil menzilin binâsı mülküm olup hâlâ sâlifü’z-zikr menzilin binâsını merkūm Ahmed Ağa’ya otuz bin nakd-i râyic fi’l-vakt akçeye bey‘-ı bâtt-ı sahîh-i şer‘î ile bey‘ ve teslîm ol dahi minvâl-i muharrer üzere iştirâ ve tesellüm ve kabûl ve kabz eyleyip arsasını dahi vakf-ı mezbûrun mütevellîsi izni ile merkūm Ahmed Ağa’ya meccânen ferâğ ve tefvîz ol dahi tefevvüz ve kabûl eyledikden sonra semen-i mezbûr otuz bin akçeyi merkūm Ahmed Ağa yedinden tamamen ahz u kabz eyledim ba‘de’l-yevm menzil-i mezbûrun binâsı mülk ve arsası hakk-ı müfevvazidir keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Efendi b. Ramazan, Mustafa Çelebi el-müezzin, Ahmed Ağa b. Hasan, Ali Bey b. İbrahim, Hasan b. Hudâverdi, el-Hâc Mustafa b. Muharrem.