İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 653 Hüküm no: 766 Orijinal metin no: [97b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Hasan’ın bazı eşyaları ile mehrinin bir kısmını kocası Abdülkadir b. Hacı’ya hibe ettiği Hîbe eşyâ ve mehrinden sekiz yüz akçe. Mahmiye-i İstanbul’da Zeyrek mahallesi sâkinelerinden Havva bt. Hasan nâm hatun meclis-i şer‘de hâlâ zevci işbu râfi‘u’l-kitâb Abdülkadir b. Hacı nâm kimesne mahzarında bi-tav‘ihâ ikrâr ve takrîr-i kelâm edip silk-i mülkümde münselik dört minder ve bir döşek ve bir yasdık ve iki köhne yemenî yorgan ve bir köhne kumaş yorgan ve bir köhne kebe ve bir köhne orta keçesi ve iki ayaklı sahan ve bir leğen ve bir ibrik ve bir tencere ve bir sepet sandığı ve zimmetinde mütekarrir ve ma‘kūdün-aleyh olan bin akçe mehr-i mü’eccelimin dahi sekiz yüz akçesini zevcim mezbûr Abdülkadir’e hîbe-i sahîha-i şer‘iye ile hîbe ve temlîk ve zikrolunan eşyâyı teslîm eyledim ol dahi meclis-i hîbede ittihâb ve zikri mürûr eden eşyâyı kabz edip zimmetinde olan bin akçe mehrimin sekiz yüz akçesini kabûl eyledi ba‘de’l-yevm zikrolunan eşyâ ve meblağ-ı mezbûr zevcim Abdülkadir’in mülk-i mevhûbudur keyfe mâ yeşâ’ mutasarrıf olsun dedikde mukırre-i mezbûre Havva’nın ber-minvâl-i muharrer cârî ve sâdır olan ikrâr-ı meşrûhunu el-mukarru lehu’l-merkūm Abdülkadir bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Musa Halîfe b. İbrahim el-kayyum, Mehmed Çelebi b. Muharrem, Mustafa Beşe b. Mehmed, Mehmed Çelebi b. Mustafa.