İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 654 Hüküm no: 767 Orijinal metin no: [97b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şamizâde Hacı Mehmed Efendi’nin 45,5 kese akçe vererek Tosya’da birer han ve mescid ile otuz altı adet dükkân yapmak üzere görevlendirdiği Mehmed Ağa b. Kasım’ın zimmetini ibra ettiği Reis efendi hüccetidir. Sonradan zam olunmuşdur. Sahîhdir. Husûs-ı âti’l-beyânın mahâllinde tahrîri iltimâs olunmağın savb-ı şer‘den nâibimiz olan Mehmed Efendi b. Ahmed irsâl olunup ol dahi atebe-i aliyye-i Sultan iyye-i lâ-zâlet meşhûnetuhû bi’l-inâyâti’s-sübhâniyede hâlâ reisülküttâb olan iftihâru a‘refi zevi’l-avârıf usvetü ashâbi’l-kelimât ve’l-ma‘ârif hâvi’l-mekârim ve’l-meâli el-mahfûfu bi-sunûf-i avâtıfi’l-meliki’s-samed Şâmizâde el-Hâc Mehmed Efendi hazretlerinin mahmiye-i İstanbul’da Şehsüvar mahallesinde vâki‘ menzil-i âlîlerine varıp zeyl-i kitâbda esâmîleri mastûr Müslimîn huzûrunda akd-i meclis-i şer‘-i kavîm eyledikde fi’l-asl Vilâyet-i Anadolu’da Tosya kasabasından olup hâlâ mahmiye-i mezbûrede müsâferet tarîki üzere sâkin olan Mehmed Ağa b. Kasım meclis-i ma‘kūd-ı mezbûrda işbu kitâb-ı sıhhat-nisâbın sahibi mûmâ-ileyh efendi hazretleri huzûrunda ikrâr ve takrîr-i kelâm edip kasaba-i mezbûrede bir hân ve dâhilinde bir mescid-i şerîf ve etrâfında otuz altı bâb dükkân binâ olunmak ve çadır ile konulmak inde’l-ahâlî ma‘lûmü’l-hudûd bir mikdâr arâzi alınmak için mûmâ-ileyh efendi hazretlerinin bundan akdem sipâriş ve mutasarrıf olmak için yedime bi’d-defa‘ât teslîm eyledikleri her kîsesi kırkar bin akçe olmak üzere cem‘an kırk beş buçuk kîsenin kendi defterim nâtık olduğu üzere kırk iki buçuk kîsesini sipâriş etdikleri ebniye ve arâziye sarf edip ve cümle erbâb-ı hukūka hakların bi’t-tamam teslîm eylediğimden sonra üç kîsesi yedimde bâkī kalmış idi hâlâ yedimde bâkī olan üç kîse akçeyi mûmâ-ileyh efendi hazretlerine teslîm edip zikirleri mürûr eden hân ve mescid-i şerîf ve dükkânların iştirâ olunan levâzımı bahâsına ve bi’l-cümle ücret ve sâir mesârıfını erbâbına teslîm etmişimdir. Ba‘de’l-yevm husûs-ı mezbûra müte‘allik bir kimesne zuhûr edip hakk-ı da‘vâ ederse benden taleb olunup benim zimmetimde kalmış olsun dedikde mukırr-ı mezbûru cârî olan ikrâr-ı meşrûhunda mûmâ-ileyh efendi hazretleri bi’l-muvâcehe tasdîk ve bi’l-müşâfehe tahkīk etmeğin vâki‘ hâli mevlânâ-yı mezbûr mahâllinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-müderrisîni’l-kirâm Mustafa Efendi be-medrese-i Süleymâniye, Fahrü’l-emâsil ve’l-akrân Mezid Ağa ser-bevvâbân-ı Dergâh-ı âlî, es-Seyyid Mehmed Efendi b. Ahmed Eyyûbî, Ali Çavuş b. ( ), Muharrirü’l-hurûf Ahmed Efendi, Fahrü’l-akrân Şahin Ağa b. Abdülmennan, Receb Çavuş b. Mustafa, Musa Çavuş, Ahmed Ağa b. Tayyib.