İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 656 Hüküm no: 769 Orijinal metin no: [98a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Polika bt. Toma’nın Ürgüp’teki bağını tek başına zaptettiği iddiasıyla varislerden Çapet v. Yorgi tarafından Anili v. Mami aleyhine açılan davanın reddi Hüccet-i bağ. Vilâyet-i Anadolu’da Ürgüb kazâsına tâbi‘ Sinason nâm karye sâkinelerinden iken bundan akdem hâlike olan Polika bt. Toma nâm Nasrâniyenin verâseti zevc-i metrûkü Sevastos v. İstiradi nâm zimmî ile li-ebeveyn kız karındaşı oğlu Çapet v. Yorgi nâm zimmîye münhasıra olduğu şer‘an zâhir ve müte‘ayyin oldukdan sonra mes’eleleri iki sehimden olup bir sehmi mezbûr Sevastos’a ve bir sehmi mezbûr Çapet’e isâbet eyledikden sonra mezbûr Çapet mahfil-i kazâda zikrleri câ’î bağlara vâzı‘u’l-yed idiği şer‘an sâbit olan işbu bâ‘isü’s-sifr Anili v. Mami nâm zimmî muvâcehesinde üzerine da‘vâ ve takrîr-i kelâm edip mezbûr Anili hâlike-i mezbûrenin emlâkinden olup karye-i mezbûr sınırı dâhilinde vâki‘ bir tarafdan kendi mülküm ve [bir] tarafdan nehir ile ve bir tarafdan Amiroğlu Dermid mülkü ve bir tarafı cebel ile mahdûd Jengi Bağı demekle ma‘rûf bir kıt‘a bağıdır yine karye-i mezbûre hudûdu dâhilinde vâki‘ Kettânlık Bağı demekle ma‘rûf olup bir tarafı Goraoğlu mülkü ve bir tarafı kendi mülküm ve bir tarafı Kulaksız kızı Anataş mülkü ve bir tarafı cebel ile mahdûd bağların nısf-ı şâyi‘i bana intikāl eylemişken zikrolunan bağları kendi mülkü olmak üzere merkūm Anili zabt ve tasarruf eder suâl olunup benim hissemden kasr-ı yedine tenbîh olunması matlûbumdur dedikde gıbbe’s-suâl mezbûr Anili cevâbında zikrolunan bağları müdde‘î-i mezbûrun mûrisesi hâlike-i mezbûre Polika’nın hâl-i hayatında mülkü olmak üzere zevci mezbûr Sevastos bana semen-i ma‘lûma târih-i kitâbdan yirmi sene mukaddem bey‘ ve teslîm edip ben dahi iştirâ ve tesellüm ve kabûl etdikden sonra sâlifü’z-zikr bağları hâlike-i mezbûrenin hayatında on iki sene ve ba‘de helâkihâ sekiz sene cem‘an yirmi sene zabt ve tasarruf edip müdde‘î-i mezbûr dahi sükût etmişdir dedikde gıbbe’s-suâl müdde‘î-i mezbûr cevâbında fi’l-vâki‘ hâl bast olunan minvâl üzere idiğini bi-tav‘ihâ ikrâr ve i‘tirâf etmeğin ikrârı mûcebince yirmi sene mürûr eden da‘vânın bilâ-emr istimâ‘ı memnû‘ olmağın mezbûr Çapet da‘vâ-yı mezbûreden men‘ olunup mâ-vaka‘a bi’t-taleb ketb olundu. Fi’l-s-sâbi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Şükrullah b. Mustafa, Abdi b. Hüseyin, Mustafa b. Mehmed, Mehmed b. Ramazan, Hüseyin b. Ebûbekir, Rasûl b. Rıdvan.