İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 662 Hüküm no: 780 Orijinal metin no: [99a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe b. Hasan’ın kaybolan parasının Mustafa Beşe b. Yusuf tarafından bulunup kendisine teslim edildiği İkrâr-ı meblağ. Fi’l-asl Vilâyet-i Rumeli’nde Avlonya Sancağı’nda Tomorniçe (Tomoriça, Tomorince) kazâsına tâbi‘ Karadepe nâm karye sükkânından olup hâlâ mahmiye-i İstanbul’da yeniçeri tâifesinin yirmi dört ağa bölüğüne mahsûs oda ahâlîsinden Hüseyin Beşe b. Hasan nâm kimesne meclis-i şer‘de işbu râfi‘u’l-kitâb Mustafa Beşe b. Yusuf mahzarında ikrâr ve takrîr-i kelâm edip bundan akdem bin yetmiş târihinde vâki‘ harîk-i gālibde yedi yüz altmış kıt‘a riyâlî guruşum zâyi‘ olmuş idi meblağ-ı mezbûru mezbûr Mustafa Beşe târih-i mezbûrda bulup yine kendi mührüm ile bi’t-tamam ve’l-kemâl bana teslîm ben dahi yedinden tamamen ahz u kabz eyledim bir akçe ve bir habbe bâkī kalmadı dedikde mukırr-ı merkūm Hüseyin Beşe’nin minvâl-i muharrer üzere cârî ve sâdır olan ikrârını mezbûr Mustafa Beşe bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Ağa ser-bölük, İbrahim Yazıcı, Osman Beşe er-râcil, Süleyman Beşe el-yesârî, Usta Abdullah, Mehmed Çelebi b. Abdullah.