İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 667 Hüküm no: 789 Orijinal metin no: [100a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsa b. Eyüb ve kız kardeşi Teslime Hatun’un alacak hususunda Mehmed Beşe b. Mustafa ile sulh oldukları Sulh, ibrâ. Mahmiye-i İstanbul’da Küçük Karaman’da Hâfız Câmi‘i kurbünde sâkin İsa b. Eyüb kendi tarafından asâleten ve li-ebeveyn kız karındaşı Teslîme Hatun’un vekîli olup zât-ı mezbûreyi ma‘rifet-i şer‘iye ile ârifân olan müvekkile-i mezbûrenin sadrî oğlu Ramazan b. Ali ve Mürsel b. Hanefî nâm kimesneler şehâdetleri ile şer‘an vekâleti sâbite olmağın vekâleten meclis-i şer‘-i hatîrde işbu râfi‘u’l-kitâb Mehmed Beşe b. Mustafa nâm râcil mahzarında ikrâr ve takrîr-i kelâm edip târih-i kitâbdan on iki sene mukaddem Vilâyet-i Anadolu’da medîne-i Magnisa’da vefât edip verâseti benim ile müvekkilem ve kız karındaşım mezbûre Teslime’ye münhasıra olan karındaşım Mehmed’in gāib ani’l-meclis Muslı b. Hanefî nâm kimesne ben karındaşım müteveffâ-yı mezbûrun karındaşı oğluyum deyü hîn-i vefâtında yirmi yedi bin akçesini kabz etmeğin üç sene mukaddem mezbûr Muslı’yı mahrûse-i Üsküdar’da kolluk önünde ahz edip meblağ-ı mezbûru taleb eylediğimde mezbûr Muslı Beşe tereke-i müteveffâ-yı mezbûrdan ancak on sekiz bin akçesini kabz eylediğini ikrâr eyledikden sonra ikrârı mertebesi olan sekiz bin akçeye mezbûr Mehmed Beşe emr ve kabûlü hâviye kefâletle kefîl olup hatta huzûr-ı şuhûdda kefâletini ikrâr dahi eylemişdir deyü meblağ-ı mekfûlün-bihi mezbûr Mehmed Beşe’den bundan akdem da‘vâ ve taleb ve ol dahi inkâr ve ben dahi müdde‘âmı isbât sadedinde olmağla beynimizde münâza‘ât-ı kesîre câriye ve sâdıre olmuş idi el-hâletü hâzihî mâbeynimize Müslimûn-ı muslihûn vesâteti ile mezbûr Mehmed Beşe da‘vâ-yı meşrûhamdan benimle beş bin beş yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûru tamamen mezbûr Mehmed Beşe yedinden asâlet ve vekâletim hasebiyle alıp kabz edip mâ‘adâsından asîl ve kefîlinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Beşe b. Hüseyin el-mübâşir, Mustafa Efendi b. Mehmed el-imâm, Hacı Mustafa b. Abdullah, Hacı Mehmed b. Yusuf, Selim Beşe b. Ali, Receb b. Veli, Muslı b. Mehmed, Osman b. Ali.