İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 668 Hüküm no: 790 Orijinal metin no: [100a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Mehmed’in Sahhaf Süleyman mahallesindeki mülk menzilini Hazinedar Mustafa Ağa ve kardeşi Hacı Ali’ye sattığı Mülknâme ale’l-iştirâk. Dârü’l-hilâfeti’l-aliyye Kostantıniyyeti’l-mahmiye’de Sahhâf Süleyman mahallesinde sâkin Ali Ağa b. Mehmed el-müteferrika meclis-i şer‘-i hatîr-i lâzımü’t-tevkīrde bâ‘isü’l-kitâb mefharu’l-eşbâh Hazînedâr Mustafa Ağa b. Rıdvan tarafından ikrâr-ı câ’i’z-zikri tasdîka vekîl ve kendi tarafından asîl birâderi el-Hâc Ali Ağa b. Rıdvan mahzarında ikrâr ve takrîr-i kelâm edip mahalle-i mezbûrede vâki‘ bir tarafdan merhûm Rüstem Paşa vakfı ve bir tarafdan Pazarbaşı el-Hâc Hüseyin mülküne ve tarafeyni tarîk-i âmma müntehî içinde hamamı ve bir bâb mahzeni ve bi’r-i mâ’ı ve kenîfi müştemil dört taş duvarı hâvî mülk-i muhterik menzilimin mülk ve arsası ile içinde mevcûd ma‘lûmü’l-mikdâr nıkzını tarafeynden îcâb ve kabûlü hâvî bey‘-ı bâtt-ı sahîh-i şer‘î ile mûmâ-ileyh Mustafa Ağa ile karındaşı vekîl-i mezbûr el-Hâc Ali Ağa’ya ber-vech-i iştirâk-i seviy bin beş yüz kıt‘a esedî guruşa bey‘ ve teslîm onlar dahi ber-minvâl-i muharrer iştirâ ve kabz eylediklerinden sonra semeni olan meblağ-ı mezkûr bin beş yüz esedî guruşu yedlerinden tamamen alıp kabz eyledim min-ba‘d arsa-i mahdûde-i mezkûre ve nıkz-ı merkūm müvekkil-i mûmâ-ileyh Mustafa Ağa ve karındaşı vekîl-i mezbûr el-Hâc Ali Ağa’nın mülk-i müşterâsı olup benim alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-müderrisîn Mehmed Efendi b. el-Hâc Ahmed, İbrahim Ağa ser-hâzin-i bîrûnî, el-Hâc Halil b. Lütfullah, Mehmed Ağa b. Mustafa, Hasan Ağa el-cündî, Mahmud Efendi b. Mehmed, Osman Efendi b. Ömer, Süleyman b. Hasan, Hasan Bey b. Süleyman, Ahmed Bey b. Mehmed, Mustafa b. Musa, Abdülkerim b. Abdullah.