İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 669 Hüküm no: 791 Orijinal metin no: [100a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ayşe bt. Ahmed’in varislerinden kardeşi Mustafa Beşe’nin miras hususunda kocası Abdi Çelebi b. Hüseyin ile sulh olduğu Mahmiye-i İstanbul’da Keçeci Pîrî mahallesinde sâkine olup mukaddemâ fevt olan Âişe bt. Ahmed nâm hatunun verâseti zevc-i metrûkü Abdi Çelebi b. Hüseyin’e ve li-ebeveyn karındaşı Mustafa Beşe ile li-ebeveyn kız karındaşı Fâtıma Hatun’a münhasıra olduğu şer‘an zâhir oldukdan sonra mezbûr Mustafa Beşe meclis-i şer‘de mezbûr Abdi Çelebi mahzarında tav‘an ikrâr ve takrîr-i kelâm edip bundan akdem kız karındaşım mezbûre Âişe Hatun vefât eyledikde muhallefâtından on bir bin akçe kıymet-i şer‘iyeli bir cevherî altın kuşak ile bir çift altın bileziği ve zimmetinde olan karz üç bin akçeden li’z-zekeri mislü hazzi’l-ünseyeyn hissemi mezbûr Abdi Çelebi’den da‘vâ ve taleb eylediğimde mezbûr Abdi Çelebi kabzını ikrâr edip ben dahi ikrârı mûcebince hisse-i şer‘iyemi almak sadedinde iken beynimize muslihûn ve Müslimûn tavassut etmekle hisse-i merkūmemden an-ikrâr mezbûr bin beş yüz akçe üzerine benim ile sulh olup ben dahi sulh-ı mezbûru kabûl ve bedel-i sulh olan bin beş yüz akçeyi mezbûr Abdi Çelebi yedinden bi’t-tamam alıp kabz edip mâ‘adâ da‘vâsından mezbûr Abdi Çelebi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Hüseyin Efendi el-Burûsî, Osman b. Mehmed, İbrahim Çelebi b. Mustafa, Mehmed Çelebi b. Mustafa, Durmuş Beşe b. Hasan, Abdi Çelebi b. ( ), Baba Rasûl b. ( ), Ahmed Çelebi b. ( ), Mahmud kethudâ-yı muhzırân.