İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 669 Hüküm no: 792 Orijinal metin no: [100b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Hacı Ali’nin, Mahmud Ağa b. Ahmed’in kendisinden haksız yere otlak resmi aldığına dair iddiasını ispat edemediği Hüccet-i yemîn. Dergâh-ı âlî yeniçerilerinin elli dokuzuncu ağa bölüğü odası neferâtından bâ‘isü’l-kitâb Mustafa Beşe b. el-Hâc Ali mahfil-i kazâda ber-vech-i arpalık hâlâ Karesi Sancağı’na mutasarrıf olan vezîr-i mükerrem Hüseyin Paşa hazretlerinin sâbıkā mütesellimi olan Mahmud Ağa b. Ahmed mahzarında üzerine da‘vâ ve takrîr-i kelâm edip Balıkesri [Balıkesir] kasabasına tâbi‘ olan otlağın resmi ol sancağa mutasarrıf olanlara hâsıl kaydolunmağla ahâlî-i kasabadan her kimin davarları otlarsa defterde beher sene dört yüz akçe resm versin deyü mastûr ve mukayyed olup ber-mûceb-i defter benim dahi davarlarım otlamağla üzerime dört yüz akçe resm lâzım iken mezbûr Mahmud Ağa zulmen benim sekiz bin akçemi almışdır suâl olunup dört yüzden mâ‘adâ[yı] bana reddetmek matlûbumdur dedikde gıbbe’s-suâl mezbûr Mahmud Ağa cevâbında ber-minvâl-i muharrer ol otlağın resmi ol sancağa mutasarrıf olanlara defterde hâsıl kaydolup ol otlakda davar otaranlar için gāib ani’l-meclis kasaba-i mezbûre süvârisi Mustafa Beşe yedinden sekiz bin akçe alıp kabz eyledim müdde‘î-i mezbûrdan otlak nâmına bir akçe ve bir habbe almadım deyü ber-minvâl-i muharrer müdde‘î-i mezbûr yedinden akçe kabz eylediğini inkâr edicek müdde‘î-i mezbûrdan müdde‘âsı için beyyine taleb olundukda ityân-ı beyyineye kādir olmamağla istihlâf etmeğin mezbûr Mahmud Ağa’ya inkâr-ı mezbûruna mutâbık yemîn teklîf olundukda ol dahi hasbe’l-mesûl yemîn billâhi’l-aliyyü’l-azîm etmeğin müdde‘î-i mezbûr Mustafa Beşe bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdi Çelebi b. Hüseyin, Rasûl b. Rıdvan, Mehmed b. Ramazan, Hasan b. Mustafa, Hüseyin b. Ebûbekir.