İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 670 Hüküm no: 793 Orijinal metin no: [100b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Anastaş’ın Hüseyin Bey b. Abdullah’a koyun bedelinden yirmi bin akçe borcu olduğunu ikrar ettiği İkrâr-ı deyn. Mahmiye-i İstanbul’da Ali Paşa-yı Atîk mahallesinde sâkin Hüseyin Bey b. Abdullah meclis-i şer‘-i hatîrde kasab tâifesinden Yorgi v. Anastaş nâm zimmî muvâcehesinde üzerine takrîr-i da‘vâ edip mezbûr Yorgi zimmetinde yedimden müşterâ ve makbûz adedi beynimizde ilm-i şer‘î ile ma‘lûm koyun semeninden yirmi bin akçe hakkım vardır hâlâ taleb [ederim], suâl olunsun dedikde gıbbe’s-suâl mezbûr Yorgi cevâbında vech-i muharrer üzere müdde‘î-i mezbûr yedinden müşterâ ve makbûz koyun semeninden yirmi bin akçe hakkı vardır deyü ikrâr ve i‘tirâf etmeğin mûcebince meblağ-ı mezbûru edâ ve teslîme merkūm Yorgi’ye ba‘de’t-tenbîh mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mu‘îd Mustafa Efendi, İbrahim Efendi, Hüseyin Efendi el-kādî, İbrahim Çavuş el-mübâşir, eş-Şeyh Mehmed Çelebi b. eş-Şeyh Mehmed, Mustafa Efendi.