İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 670 Hüküm no: 794 Orijinal metin no: [100b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Mehmed’in satılan köle bedelinden Hacı Ahmed b. Mansur’da olan alacağını tahsil ettiğini ikrar ettiği Gulâm semeninden ikrâr-ı meblağ. Fi’l-asl Mağrib diyârında olup hâlâ müsâferet vechi üzere mahmiye-i İstanbul’da Üskübî mahallesinde sâkin el-Hâc Ahmed b. Mansur nâm kimesne meclis-i şer‘-i hatîr-i lâzımü’t-tevkīrde hâlâ Tunus Vâlîsi ‘izzetlü Mehmed Paşa yesserallâhu mâ yeşâ’ hazretlerinin kapıkethudâları olan fahrü’l-emâsil ve’l-akrân makbûlü’s-sudûr ve’l-erkân Mehmed Ağa b. Mehmed en-Numân mahzarında takrîr-i kelâm edip mezbûr Mehmed Ağa’nın medîne-i İzmir’de sâkin vekîli Ömer Beşe b. el-Hâc Mehmed el-Mağribî Efrenciyyü’l-asl Mastor b. Covan nâm abd-i memlûkünü yine kendi babası yelkenci müste’mene tâmmü’l-vezn ve’l-ayâr üç yüz riyâlî guruşa bey‘ ve semenini benimle merkūm Mehmed Ağa’ya irsâl ve ben dahi getirip yedlerine teslîm etmişimdir husûs-ı mezbûr mûmâ-ileyh Mehmed Ağa’dan suâl olunup takrîri tahrîr ve yedime def‘ olunmak matlûbumdur dedikde gıbbe’s-suâl mûmâ-ileyh Mehmed Ağa cevâbında fi’l-vâki‘ vekîlim Ömer Beşe’nin bey‘ eylediği memlûke Mastor [v.] Covan semeni olan tâmmü’l-vezn ve’l-ayâr üç yüz riyâlî guruşu merkūm el-Hâc Ahmed yedinden bi’t-tamam ve’l-kemâl ahz u kabz eyledim dedikde ol ki vâki‘ hâldir bi’t-taleb ketb olundu. Fi’l-yevmi’s-sâbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc İsa b. Abdülmümin, el-Hâc Selim b. Cuma, Hüseyin b. Hüseyin Efendi ve gayruhum mine’l-huzzâr.