İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 676 Hüküm no: 803 Orijinal metin no: [101b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Nuh Bey’in varislerinden halası Canan ile teyzesi Hatice’nin miras hususunda sulh oldukları Yüz yirmi bin akçe[ye] sulh, ibrâ. Mahmiye-i İstanbul’da Mahmudpaşa mahallesinde sâkin bundan akdem fevt olan Nuh Bey b. Rıdvan’ın verâseti vâlidesi Âişe Hanım’ın li-ebeveyn kız karındaşı Hadîce Hanım’a ve babası mezbûr Rıdvan’ın li-ebeveyn kız karındaşı Canan bt. Abdullah’a münhasıra olduğu şer‘an zâhir ve mütebeyyin oldukdan sonra mezbûre Canan meclis-i şer‘de tereke-i müteveffâ-yı mezbûra vâzı‘atü’l-yed olan merkūme Hadîce Hanım muvâcehesinde ikrâr ve i‘tirâf edip müteveffâ-yı mezbûrun zimem-i nâsda olan hukūkundan bana isâbet eden hissemden guremâ berî olmak üzere müteveffâ-yı mezbûrun nükūd-ı menkūl ve akār ve esâs-ı beyt ve evânî-i nühâsiye ve gayr-ı nühâsiye ve bi’l-cümle ism-i mâl ıtlâk olunur terekesinden şerâ’it-i sıhhat-ı sulhu hâvî ve mevâni‘-i müfsideden ârî tehârüc-i şer‘î tarîki üzere merkūme Hadîce Hanım ile yüz yirmi bin akçe üzerine sulh olup bedel-i sulh olan meblağ-ı mezbûr yüz yirmi bin akçemi merkūme Hadîce Hanım yedinden bi’t-tamam ahz u kabz edip müteveffâ-yı mezbûrun kalîl ve kesîr ve celîl ve hakīr terekesine müte‘allika âmme-i de‘âvî ve eymân ve muhâsamâtdan mezbûr Hadîce Hanım’ın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm mezbûre Hadîce Hanım ile zikrolunan husûslara müte‘allika vechen mine’l-vücûh ve sebeben mine’l-esbâb da‘vâ ve nizâ‘ım ve alâka ve medhalim kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Umdetü kuzâtü’l-İslâm Mustafa Efendi, Zübdetü vülâti’l-enâm Derviş Efendi, Hasan Ağa mütevellî-i Sultan -ı Mehmed Hân, Mehmed Ağa b. Ali, Mustafa Çavuş b. Mehmed, Ali Bey b. Abdullah, Mehmed b. Hasan, Ramazan Çavuş el-mübâşir, Abdullah Efendi el-imâm-ı mahalle-i Debbağyunus, Abdi b. Hüseyin, Hüseyin Çelebi b. ( ), Hüseyin Çavuş b. ( ), İbrahim Çavuş b. ( ).