İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 677 Hüküm no: 804 Orijinal metin no: [102a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mir Mehmed Ağa b. Melek Mehmed’in menzil ve bahçesini karısı Bedirhan bt. Nimetullah’a sattığı Mübâya‘a, Mîr Mehmed Ağa’nındır. Mahmiye-i İstanbul’da Ali Paşa-yı Atîk mahallesinde sâkin olup Dergâh-ı âlî kapıcıbaşılarından umdetü’l-emâcid ve’l-ekârim câmi‘ü’l-mehâmid ve’l-mekârim Mîr Mehmed Ağa b. Melek Mehmed meclis-i şer‘-i hatîr-i lâzımü’t-tevkīrde işbu sahibetü’l-kitâb fahrü’l-muhadderât zahru’l-muvakkarât zevcesi Bedirhan Hatun bt. Nimetullah tarafından ikrâr-ı âti’l-beyânı tasdîka vekîl olup nehc-i şer‘î üzere şer‘an vekâleti sâbite olan dayısı oğlu Ebulkazım Bey b. Yusuf mahzarında ikrâr ve takrîr-i kelâm edip mahalle-i mezbûrede vâki‘ bir tarafı ba‘zan kendi mülküme ve ba‘zan Korucu Ömer Beşe mülküne ve iki tarafı tarîk-i hâssa ve bir tarafı tarîk-i âmma müntehî ve muhavvâta-i dâhiliyesi beş bâb fevkānî oda ve kenîfi ve iki ahırı müştemil cemî‘ mülk menzilimi kâffe-i hukūk ve merâfıkı ve âmme-i tevâbi‘ ve levâhıkı ile ve menzil-i mezkûr hizâsında vâki‘ bir tarafı tarîk-i hâssa fâsıl olup bir tarafı Fâtıma bt. Ali Çelebi nâm hatun mülküne ve bir tarafı tarîk-i hâssa ve iki tarafı tarîk-i âmma müntehî altında kârgir mahzen olup ve üstünde eşcâr-ı müsmire ve gayr-ı müsmireyi muhteviye cüneyneyi ve bir su kuyusunu müştemil cemî‘ mülk bahçemi âmme-i hukūk ile bi-safkatin vâhidetin altı kîse riyâlî guruşa bey‘-ı bâtt-ı sahîh-i şer‘î ile müvekkil-i müşârün-ileyhâ Bedirhan Hatun’a bey‘ ve teslîm edip ol dahi iştirâ ve tesellüm ve kabûl eyledikden sonra semeni olan meblağ-ı mezbûr altı kîse riyâlî guruşu müvekkile-i mezbûre Bedirhan Hatun’a cihet-i karz-ı şer‘îden deyni olan on iki kîse riyâlî guruşun altı kîsesine takās edip ol dahi mukāssa ve kabûl eyledikden sonra ba‘de’l-yevm menzil-i mahdûd-ı mezbûr ile bahçe-i mersûme müşârün-ileyhâ Bedirhan Hatun’un mülk-i müşterâsıdır keyfe mâ teşâ’ ve tahtâr mutasarrıfe olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahru kuzâtü’l-İslâm Yahya Efendi b. Mustafa Efendi eş-şehîr bi-Çukacızâde ….?, Fahrü’l-akrân Mehmed Ağa b. Habib el-müteferrika, Seyyid İbrahim b. eş-Şeyh Mustafa Efendi, Mustafa b. Durak el-imâm, Hasan b. Ahmed el-müezzin, Receb b. İbrahim el-müezzin, İbrahim b. Mehmed el-kayyum.