İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 678 Hüküm no: 805 Orijinal metin no: [102a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mir Mehmed Ağa b. Melek Mehmed’in Atik Ali Paşa mahallesindeki menzilini borcuyla takas etmek üzere karısı Bedirhan bt. Nimetullah’a sattığı Hüccet-i takās-ı Mîr Mehmed. Mahmiye-i İstanbul’da Ali Paşa-yı Atîk mahallesinde sâkin olup Dergâh-ı âlî kapıcıbaşılarından iftihârü’l-emâcid ve’l-ekârim câmi‘ü’l-mehâmid ve’l-mekârim zü’l-kadri’r-refî‘ ve’l-câhi’l-menî‘ el-muhtassu bi-mezîd-i inâyeti’l-meliki’s-samed Mîr Mehmed Ağa b. Melek Mehmed meclis-i şer‘-i hatîrde sahibetü hâze’l-kitâb fahrü’l-muhadderât zevcesi Bedirhan Hatun bt. Nimetullah tarafından ikrâr-ı âti’l-beyânı tasdîka vekîl olup nehc-i şer‘î üzere vekâleti sâbite olan dayısı oğlu Ebulkâzım Bey b. Yusuf mahzarında ikrâr ve takrîr-i kelâm edip mahalle-i mezbûrede vâki‘ bir tarafı kendi mülküme ve bir tarafı Şaban Odabaşı mülkü ve bir tarafı Hayyât Yani mülkü ve bir tarafı tarîk-i âm ile mahdûd olup silk-i mülkümde münselik olan dört bâb fevkānî odaları ve ahırı ve hadîkayı ve kenîfi müştemil mülk menzilim müvekkil-i müşârün-ileyhâ Bedirhan Hatun’a bir kîse riyâlî guruşa tarafeynden îcâb ve kabûlü hâvî bey‘-ı bâtt-ı sahîh ile bey‘ ve teslîm ol dahi vech-i meşrûh üzere iştirâ ve tesellüm ve kabûl eyledikden sonra semeni olan bir kîse riyâlî guruşu mezbûreye on iki kîse riyâlî guruş deynim olup on bir kîsesini ânifen müşârün-ileyhâya bey‘ ve teslîm eylediğim menzil semenlerine takās ve bâkī kalan bir kîse riyâlî guruşu dahi menzil-i mezbûr semeninden olan bir kîse riyâlî guruşa takās edip ol dahi mukāssa ve kabûl eyledikden sonra ba‘de’l-yevm menzil-i mahdûd müşârün-ileyhâ Bedirhan Hatun’un mülk-i müşterâsıdır keyfe mâ teşâ’ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Sâbıkūn.