İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 679 Hüküm no: 806 Orijinal metin no: [102a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mir Mehmed Ağa b. Melek Mehmed’in Şeyh Merkez Efendi mahallesindeki menzilini borcuyla takas etmek üzere Bedirhan bt. Nimetullah’a sattığı Mahmiye-i İstanbul’da Ali Paşa-yı Atîk mahallesinde sâkin Dergâh-ı âlî dâme mahfûfen bi’l-meâli kapıcıbaşılarından iftihârü’l-emâcid ve’l-ekârim câmi‘ü’l-mehâmid ve’l-mekârim Mîr Mehmed Ağa b. Melek Mehmed meclis-i şer‘-i hatîrde işbu bâ‘isetü’l-kitâb zevcesi Bedirhan bt. Nimetullah tarafından ikrâr-ı âti’l-beyânı tasdîka vekîl olup nehc-i şer‘î üzere vekâleti sâbite olan fahrü’l-akrân dayısı oğlu Ebulkâzım Bey b. Yusuf mahzarında ikrâr ve takrîr-i kelâm edip mahmiye-i mezbûrede hısn ebvâbından Yenikapı hâricinde merhûm eş-Şeyh Merkez Efendi mahallesinde vâki‘ silk-i mülkümde münselik olup bir tarafdan vezîr-i zî-şân düstûr-ı âsaf-nişân Musa Paşa hazretleri mülkü ve bir tarafdan Sultanü’l-muhadderât bürhânü’l-muvakkarât Hanzâde Sultan -dâmet ismetuhâ- hazretleri mülkü ve bir tarafdan Hayrunnisa Hatun bt. Mehmed Efendi mülkü ve bir tarafdan tarîk-i âm ile mahdûd olup hâriciyesi iki bâb tahtânî odayı ve bir ahırı ve su kuyusunu ve mahzeni ve bir dolabı ve hadîkayı ve kenîfi ve dâhil iyyesi bir bâb fevkānî odayı ve bir hücreyi ve bir havuzu ve iki sofayı ve bir kasr-ı yed ve bir matbahı ve üç su kuyusunu müştemil olan menzilimi bi-cümleti’t-tevâbi‘ ve’l-levâhık müvekkile-i mezbûre Bedirhan Hatun’a beş kîse riyâlî guruşa tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzere iştirâ ve kabûl ve tesellüm eyledikde semeni olan meblağ-ı mezbûr beş kîse riyâlî guruşu müvekkile-i mezbûreye cihet-i karz-ı şer‘îden on iki kîse riyâlî guruş deynim olup zimmetimde bâkī altı kîse riyâlî guruşun beş kîsesine takās edip ol dahi mukāssa ve kabûl eyledikden sonra ba‘de’l-yevm hudûd-ı mezbûr ile mahdûde olan menzil müşârün-ileyhâ Bedirhan Hatun’un mülk-i müşterâsıdır keyfe mâ teşâ’ ve tahtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Sâbıkūn.