İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 679 Hüküm no: 807 Orijinal metin no: [102a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ahmed’in muhâlaa yoluyla kocası Hacı Oruc b. Musa’dan boşandığı Hul‘. Mahmiye-i İstanbul’da Arpa Emini mahallesinde merhûm Siyavuş Paşa Odaları’nda sâkine Âişe bt. Ahmed nâm hatun meclis-i şer‘de zevci işbu bâ‘isü’l-kitâb el-Hâc Oruc b. Musa mahzarında ikrâr ve takrîr-i kelâm edip mezbûr el-Hâc Oruc’un zimmetinde mütekarrir ve ma‘kūdün-aleyh dört bin akçe mehr-i mü’eccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere mezbûr el-Hâc Oruc ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete müte‘allika da‘vâdan zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed b. Nasuh, Ali b. İbrahim, Mehmed b. Cafer, Çâker b. Abdullah, İbrahim [b.] Hürrem, Ahmed Beşe b. Hürrem, Mehmed b. Mustafa, Mustafa Beşe b. Hüseyin.