İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 680 Hüküm no: 808 Orijinal metin no: [102b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Arhondi bt. Yahya’nın Handan Sultan Vakfı arsası üzerinde tasarrufunda bulunan menzilinin yanması üzerine arsasını vakfa teslim ettiği Medîne-i Galata’ya tâbi‘ Ortaköy sükkânından Arhondi bt. Yahya nâm Yahûdî tarafından husûs-ı âti’l-beyânı ikrâra vekîl olup Sefer Efendi b. Mehmed ve Bayram b. Abdullah nâm kimesneler şehâdetleri ile vekâleti sâbite olan Portugal cemâ‘atinden Mosi v. David nâm Yahûdî mahfil-i kazâda mahmiye-i İstanbul’da vâki‘ merhûm Sultan Süleyman Han hazretlerinin vâlideleri fahrü’l-muhadderât Handan Sultan Evkāfı’nın merhûm es-Seyyid Velayet Efendi evlâdından meşrûtiyyet üzere bi’l-fi‘il mütevellîsi olan işbu bâ‘isü’l-kitâb fahrü’s-sâdât es-Seyyid Mahmud Çelebi b. es-Seyyid Mustafa Çelebi mahzarında bi’l-vekâle ikrâr ve takrîr-i kelâm edip evkāf-ı mezbûre müsakkafâtından olup mahmiye-i mezbûrede Frenk mahallesinde vâki‘ bir tarafı Hüseyin Ağa tasarrufunda olan arsa-i muhterikaya ba‘zan Kasım Paşa vakfı ve ba‘zan tarîk-i âm ve bir tarafı a‘lemü’l-ulemâ’i’l-mütebahhirîn Abdurrahman Efendi mülkü ve bir tarafı tarîk-i âm ile mahdûd tûlen ve arzan be-hesâb-ı şatrancî bin yüz otuz iki buçuk zirâ‘ arsa üzerine mebnî fevkānî ve tahtânî büyût-ı müte‘addideyi müştemil menzil icâre-i mu‘accele ve beher şehr iki yüz kırk akçe vakf-ı mezbûre ücret-i mü’eccele ile müvekkilem mezbûre Arhondi’nin taht-ı tasarrufunda iken bin yetmiş senesi Zilka‘desi’nin on altıncı gününde vâki‘ olan harîk-i ekberde bi’l-külliye muhterik olup arsa-i hâliye kalmışdır hâlâ müvekkilem mezbûre kendi rızasıyla arsa-i muhterikadan kasr-ı yed edip vakıf cânibine arsa-i mezbûreyi teslîm eyledi ba‘de’l-yevm mütevellî-i mûmâ-ileyh keyfe mâ yeşâ’ ve yahtâr vakıf için zabt ve tasurruf eylesin müvekkilem mezbûre Arhondi’nin arsa-i mezkûrede kat‘a alâka ve medhali kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc Ahmed b. Enes, Abdi b. Hüseyin, Rasûl b. Rıdvan, Osman Çelebi b. Abdullah, Ali Bey b. Abdullah.